"Kahit sa magkabilang mundo man tayo, pagmamahal ko sayo'y hindi magbabago"

Saturday, November 23, 2013

Dear YES LOVE TALK 

  

      Isa pong magandang gabi sa inyong lahat, at sa mga nakikinig ng inyong programa. Sumulat po ako para ibahagi ang aking kwento ng pag-ibig at para humingi na rin po ng advice sa inyo.

    Tawagin niyo na lamang po ako sa pangalang Jenelyn 26 years old, isang empleyado sa isang hotel dito sa Boracay at mula sa probinsya ng Capiz.

   Meron po akong naging kasintahan noon na halos matatawag ko ng asawa, mahigit dalawang taon po kaming nagsama sa iisang bubong at siya din po ay nagtratrabaho sa isang hotel dati sa Boracay bilang isang maintenance.

   Pangalanan niyo na lang din po siya sa pangalang Nestor, mahal na mahal ko po siya at lagi ko pong iniisip noon na kami na ang magkakatuluyan habang buhay kahit hindi pa kami kasal.

   Ngunit sa mga paglipas ng panahon unti-unti pong nababago ang kaniyang pakikitungo sa akin at hindi ko po alam kung bakit.

   Kahit anong sinyales po ay wala po akong nakikita sa kaniya, na meron siyang ibang babae bukod sa akin.

   Pero sa mga ipinapakita niya sa aking pagbabaliwala hinahayaan ko lang iyon dahil ayaw kong dumating sa point na maghiwalay kami sa ganoong dahilan.

    Dumating yong time na lihim ko siyang sinusundan sa kaniyang trabaho at inaalam ang bawat pupunatahan niya pero bigo parin akong malaman kung bakit ganon nalang ang pakikitungo niya sa akin.

   Nang magkaroon ako nang lakas ng loob at pagkakataon na harapin siya at tanungin kung bakit ganon siya sa akin ay hindi po niya ako iniimik.

   Isang araw nagpaalam siya sa akin na gusto niya raw munang umuwi sa kanilang probisnya sa Iloilo, nagtaka po ako kung bakit siya uuwi eh halos ayaw niya pong umuwi sa kanilang lugar dahil na rin sa gastos.

  Sabi niya sa akin may importente lang siyang aayusing mga papeles ng kanilang lupang ibibinta doon, nagtaka po ako pero pinayagan ko naman siya sa kaniyang disisyon hanggang sa maka-uwi na nga siya sa kanilang lugar.

   Lubos po akong nalungkot sa kaniyang pag-alis halos palagi po akong umiiyak dahil sa namimis ko siya at hindi ako sanay na wala siya sa aking paningin, madalang na rin po siyang magtext sa akin at parang wala ng lambing sa tuwing nagkaka-usap kami sa cell phone.

  Hanggang umabot po ng isang buwan ay hindi parin siya bumabalik sa isla pero patuloy parin akong nag-aantay na ako ay babalikan niya, gumawa ako ng paraan na makapunta sa Iloilo para makita siya, nang dumating po ako doon laking gulat ko ng makitat malaman na siya ay may sakit at naka ratay nalang sa kaniyang higaan.

   Halos mangilid ang aking mga luha ng lapitan ko siya, agad ko siyang niyakap at hinalikan dahil sa sobra ko siyang namimis at naaawa ako sa kaniyang kondisyon.

   Doon niya sinabi sa akin na meron siyang cancer,  halos bumagsak ako sa aking nalaman at humagulhol ako ng sobra, sinabi pa niya sa akin na baka hindi na siya magtagal.

  Makalipas ang ilang araw na nakasama ko siya halos di na ako umaalis sa kaniyang tabi para alagaan siya.

   Pero dumating na ang araw na kailangan ko ng bumalik sa trabaho sa Boracay dahil kailangan din ako ng aking mga pamilya, mabigat ang aking loob na iiwan ko siya sa mga oras na iyon at nangako akong babalikan ko siya.

  Tatlong linggo na ang nakakalipas simula ng makabalik ako sa Boracay, tumawag ang kaniyang kapatid sa akin na humahagolgol na sinasabing wala na daw ang kaniyang kuya.

  Natahimik nalang akong bigla at umiyak na para akong hihimatayin sa mga oras na iyon, dahil sa sobrang sakit ng malaman ko na ang taong minahal ko ng sobra ay bigla nalang nawala sa akin ng ganoon kadali at hindi ko manlang alam na may dinadala pala siyang sakit.

  Agad akong nagpunta sa Iloilo para makita siya, naabotan ko nalang na nilalamayan na siya doon, agad akong lumapit sa kaniyang ataol at doon ay humagulhol na naman ako ng sobra, dahil hindi ako makapaniwala sa aking nakita.

  Love talk, sobrang sakit ang nararamdaman ko sa mga panahong iyon, namatay siya ng wala ako sa kaniyang tabi, at hindi ko manlang siya nakasama ng matagal noong nakaratay siya sa sakit.

  Hindi ko talaga matanggap na wala na siya, mahigit isang taon na simula noong mamatay ang aking kasintahan at hanggang ngayon ay iniisip ko parin siya at patuloy parin na minamahal.

   Wala akong nagawa kundi ituon nalang ang aking pansin sa trabaho dito sa Boracay at kahit minsan ay hindi ako nagkaroon ng chance na mahulog o magkagusto sa ibang lalaki dahil kay Nestor.

   Si Nestor ang buhay ko at siya ang lalaking bukod tanging nararapat na mahalin at alagaan habang buhay, pero nawala iyon dahil maaga siyang kinuha ng Diyos sa akin.

   Love talk, I’m always asking myself how to move on, panu simulan na mag mahal muli at paano kalimutan ang taong kahit kailan ay hindi ko na makikita at makakasama pa?

   Madami ng nagsasabi sa akin na kalimutan ko na siya pero hindi ko parin magawa-gawa hanggang ngayon.

    Gusto ko lang po malaman mula sa inyo Love talk kong ano pa po ang dapat kung gawin para makalimutan ko ang taong pinakamamahal ko, wala kasi akong ibang ginagawa kundi isipin ng isipin siya at mag focus sa trabaho na siya ang ginagawa kong inspirasyon?

    Nagdisyon na rin po akong lisanin ang Boracay para mag-hanap nalang ng trabaho sa Iloilo para doon lagi akong makakadalaw sa kaniyang puntod at masabi kung gaano ako nahihirapan nang-iwan niya ako.

    Sa tingin niyo po ba Love talk tama ang mga naging disisyon ko sa buhay na pagtuunan ko parin ng pansin ang taong patay na?

    Sana po maka-kuha ako sa inyo ng mga idea na makakatulong sa aking kalungkutan at kasawian sa buhay.. hanggang dito nalang po at maraming salamat sa opurtunidad na ibinigay niyo sa akin.

   

Lubos na gumagalang

      “Jenelyn”

   

Sino ang mas pipiliin ko ang ex-gf ko na mahal na mahal ko pa o ang girlfriend ko na mahal na mahal ako?

Dear YES Love talk,

       Una sa lahat ay gusto ko pong magpasalamat sa mga taong bumubuo ng inyong programa at sa mga taong magbibigay ng advice sa akin.

        Love talk tawagin niyo na lang po ako sa pangalang TOTO isang official sa isang secreting ahensya ng gobyerno bilang (Intel Officer) at naka distino dito sa Boracay.

        Love talk minsan po ay naging tagapagbigay din po ako ng payo o advice dito sa programa ninyo at siguro panahon na rin upang ako naman ang humingi ng payo, love talk ang kwento ng pag-ibig ko nong nakilala ko ang isang babaeng nagpatibok ng aking puso na tawagin nalang ninyo sa pangalang “CHERRY”, siya po ay nagtatrabo sa isang hotel dito sa Boracay.

         Naging magkaibigan kami at hindi nagtagal ay naging kami, masaya kaming nagsama at ang turing ko na rin sakanya ay parang asawa,  hindi rin maitatagong may nangyari na rin sa amin kaya nagpasya akong panagutan ang aking ginawa at maging isang responsabling lalake.

         Pinaunawa ko sa kanya ang pagmamahal na hindi matumbasan ng anu man, at pinagmamlaki ko siya sa aking mga kasamahan at sa magulang ko, ngunit Love talk dumating ang panahon na kinakatakutan ko, iniwan niya ako sa gitna ng kahihiyan, ilang beses na akong gumawa ng paraan para ma survive ang relationship namin, naranasa kung bumabad sa ulan habang hinihintay kung lumabas siya sa kaniyang tinitirahan.

         Minsan natanong ko sa aking sarili kung ano ba ang aking nagawa dahil naging tapat naman ako sa kaniya, hanggang sa pinayuhan ako ng aking malapit na kaibigan, na si kuya “MELCHOR” na tanggapin ko nalang daw ang lahat at mag move on na lamang ako.

          Lumipas ang ilang buwan at nasubukan ko na ring kalimutan siya at di nagtagal ay nakilala ko si “LYN”. Si LYN ay isang abogada at masasabing matalino, at magandang babae at di naman nagtagal ay nagustuhan niya din ako at minahal ng sobra.

           Ngunit love talk dumating ang araw na hindi ko inaasahan habang naliligo kami sa isang beach kasama ang kaibigan ko ay nakita kung muli ang babaeng nanakit ng damdamin ko, kasama niya ang mga kabarkada niya at nag-iinuman sila, love talk inisip ko nalang na may girlfriend na ako at mahal ako, at nagkunwari akong di ko siya napansin kahit alam kung tinitingnan niya rin ako ng palihim.

           Umalis kami at umuwi pero may nakalimutan akong bagay kaya binalikan ko, hanggang sa may lumapit sa aking isang tao at nagsumbong na may nagkakaguluhan raw, pinuntahan ko naman at ang lugar na itinuro sa akin at ngunit parang biglang kinurot ang aking damdamin ng makita ko si CHERRY, na nakahandusay sa buhangin at walang malay habang punong-puno ng buhangin ang mukha.

            Dali-dali ko siyang binuhat ngunit nagising siya at sinisi ako, agad ko naman siyang niyakap at hinalikan habang unti-unting pumapatak ang aking luha.

             Love talk naawa ako sa kaniyang kalagayan, mali pala ako dahil hanggang ngayon ay mahal ko pa rin pala siya at naguguluhan ako kung ano ang gagawin ko, ayaw ko ring saktan si LYN na labis din akong mahal. Love talk pano ko sisimulan ang lahat dahil pareho ko silang mahal, sana matulungan niyo po ako.

          

Maraming salamat at lubos na gumagalang

                          “TOTO”

kailangan ko pa bang pagbigyan ng pangalawang pagkakataon ang taong sobra kong minahal?

Dear YES Love Talk,

            Bago po ako mag simula sa aking kwento, nais ko po munang mag pasalamat agad sa inyo sa pag basa ng aking sulat at sa mga mag bibigay ng advice sa akin at pati na rin po sa mga nakikinig. Salamat po. 

            Tawagin niyo na lamang po ako sa pangalang ''TRISHIA'' 23 years old, at nag-tratrabaho po dito sa isla.

            Meron po akong boyfriend, Asawa na nga rin po ang turingan namin sa isa’t isa dahil nag-sasama na rin kami. Mag si-six years na po ang aming relasyon ni ''ARVIN''. 

Masaya po kaming nagsasama, open pa ang aming relasyon sa lahat, lalo na sa pamilya namin. Pero biglang nagbago po yon, nang biglang pumasok sa eksena si ''JESSA'', kasamahan niya po sa trabaho.

            Mag-iisang buwan na ng malaman ko at nahuli ko pa mismo na niloloko po nila ako. Masakit, lalo pa’t hindi naman nagawa ni Arvin ang mga bagay na ganito noon.
    

Speechless ako, dumating ang oras na nag give up ako at dahil nga sa mahal ko siya lumaban po ako ulit . Ginawa ko lahat para ma save ko ang relationship namin.

I admit may mali din ako sa mga nangyari. To save our relationship pinatawad ko po sila, nag-trust at nag beg pa ako kay Arvin even kay Jessa.

Nag usap kaming tatlo at nangako si Jessa naiiwas na siya dahil sa ayaw nya raw pa masira lamang ang relasyon namin dahil sa kanya tama na raw na nag pa “selfish” siya. Dahil umpisa palang, alam niyang my responsibilidad na si Arvin.

            I thought, okay na ang lahat, dahil nararamdaman ko ulit ang pagmamahal ni Arvin. Nag-eeffort na siya, tulad ng dati.

Until one morning, nakita ko sa cellphone niya, yong mga mensahe nila ni Jessa. Wala akong nagawa that time, kundi ang umiyak. Patuloy pa rin pala ang relasyon nila. Pilit po akong niyayakap ni Arvin that time, pero hindi man lang niya sinasagot ang mga tanong ko. Hanggang iniwan niya akong hindi pa namin napag-usapan ang sitwasyon.

            At dahil po sa nasaktan ako sa ginawa niya, I told him to decide, kung sino ba talaga sa amin ni JESSA ang gusto niyang makasama. Ang sagot niya po sa akin, ay asawa na ang turing ko saiyo. “Takot akong iwan mo ako. Takot akong ma wala ka. Mahal kita, pero kasi napamahal na siya sakin“. Doon po ako nasaktan ulit.

Hindi siya makapag-decide, at dahil sa mga sinabi niyang iyon, ay nag-assume ako na ako pa rin ang panalo. Tinanong ko siya ulit, pero laking gulat ko nalang, nang sabihin niyang “mas magandang iwan niya nalang ako”. Dahil daw sa naging apurada ako sa desisyon niya. Dalawa daw kami ni Jessa ang iiwan niya, para patas.

            Masakit po ang marinig mo sa taong minahal mo nang lubos, pinagkakatiwalan at nirerespeto sa lahat ng pagkakamali niya na iiwan kalang, dahil sa hindi ka makapaghintay, 

         Masakit na sa mga panahong magkasama kami, ay lagi niyang sinasabing mahal ka niya at handa siyang bumuo ng pangarap kasama ka pero mawawala lang bigla nang dahil sa taong halos wala pang tatlong buwan niya nakilala, sa taong basta nalang nag-pahubad, at dahil sa nagpakita ng motibo sa kanya.

            Gusto ko pong sisihin si Jessa, dahil sa pagiging desperado niya. Pero may mali din si Arvin. At aaminin ko na may mali din ako, napakabata pa ni Jessa para sirain ang buhay namin alam kong nagmahal lang siya pero nasakta nako sa ginawa niyang pag-balewala sa usapan namin at pangako niya at sa trust and forgiveness na binigay ko.

            Arvin rejected all our plans just because of her, even our marriage plan.

            Love talk, ano po ba ang dapat kong gawin, gusto kong mag-move on, at tanggapin nalang pero hindi ko kaya. Minahal ko kasing lubos si Arvin. Handa akong mag-sacrifice para lang maayos ang lahat pero di ko rin alam ang gagawin ko.

            Nagpaparamdam din kasi siya sa akin, at pinapakita na may care pa siya sa akin. Pero ramdam ko ding patuloy pa rin sila ni Jessa. At ang isa pa po sa nag-papagulo ng isip ko ay sinabi niya kamakailan na bigyan ko siya ng tamang oras para makapag-isip.

            Tama po ba naumasa pa ako sakanya? O ako na mismo ang mag-give up?

           Iniisip lo lang sa ngayon na LUST lang ang nangyayari sa kanila, na darating ang araw ay mag babago din yun.

            Ano at Paano po ang gagawin ko? Nasasaktan na kasi ako at napapagod na rin pero di ko pa kayang mag-give up.

            Sana po mabigyan niyo po ako ng advice.

            

   Lubos na umaasa

                                                               
      ''TRISIA"

Pakiki-alaman ba ang two timer na kaibigan?

Dear YES Love Talk,

Mainit na pagbati po ang bati ko sa inyong lahat. Naguguluhan po ako sa aking sitwasyon kaya’t naisipan kong sumulat dito sa inyo.

Itago n’yo na lang po ako sa pangalang “RICKY”, isang empleyado dito sa Boracay. 23 years old po at single.

May nagugustuhan akong babae, si “CRYSTAL”. Medyo matagal-tagal ko na rin siyang kakilala dahil magkatrabaho din kami dati, kaya lang lumipat siya ng trabaho. Magkaibigan din naman kami at nagkakakuwentuhan din paminsan-minsan kapag may panahon. Matagal ko na din siyang gusto kaya lang torpe ako.

At ngayon, lalong hindi ko na siya p’wedeng ligawan dahil girlfriend na siya ng ka-trabaho kong si “JONARD”. Bago lang si Jonard sa pinagtatrabahuhan namin pero mukhang matagal na rin naman silang magkakilala ni Crystal.

Wala pang isang taong si Jonard sa trabaho pero alam ko na ang ugali niya. Hindi siya tapat kay Crystal. Alam kong may itinutukso sa kanyang kasamahan ko din sa trabaho at alam kong sinasakyan niya lang ito, pero hindi ko alam na magiging sila din pala. Nalaman ko na lang ito nang magkainuman kami dahil ipinagyabang pa niya ito sa amin.

Doon ko din nalaman na matagal-tagal na rin pala silang magkarelasyon, nasa tatlong buwan na. Pero nakikita ko pa rin silang magkasama ni Crystal, at masaya naman sila kapag magkasama sila. Pero ako ang nakukunsensya at naaawa kay Crystal. Hindi naman siya karapat-dapat sa ganoong trato dahil alam kong hindi naman siya two timer.

Minsan tinanong ko na siya kung bakit si Jonard pa ang napili niya, pero sinabi niya na dahil mahal niya lang talaga si Jonard, at hindi na ako nagtanong pa.

Love Talk, alam ko na masasaktan si Crystal sa mga ginagawa ni Jonard, pero iniisip kong para naman ito sa kapakanan niya. Dapat ko ba talagang sabihin kay Crystal na niloloko lang siya ni Jonard, o hahayaan ko na lang sila? Anong dapat kong gawin?

Maraming salamat po sa inyong oras. Sana ay matulungan ninyo ako.

Umaasa,

“RICKY”

Discreet gay

Dear YES Love Talk,

Magandang gabi sa inyong lahat na sumusubaybay ng programang YES Love Talk. Sana ay nasa mabuting kalagayan kayo sa pagbasa ninyo sa aking sulat.

Itago n’yo na lang ako sa pangalang “ANTHONY”, 26 years old, at nagtatrabaho dito sa Boracay.

Gay po ako.

Mula pa noon ay alam ko nang isa akong babaeng na-trap sa kaanyuan ng isang lalake. Pero sa kilos, pananalita at sa pananamit ko ay masasabi kong hindi ito mahahalata ng basta-basta lang. Dahil na rin siguro sa pamilyang kinalakhan ko.

Nasa elementary pa lang ako nang pumanaw ang aking ina kaya ako at ang tatlo kong mga nakatatandang kapatid ay pinalaki ng solo ng aking ama na hindi na ulit nag-asawa.

Istrikto siya, at alam kong hindi niya ako matatanggap kapag nalaman niyang bading ako. At malamang ganoon din ang dalawang kuya ko.

Kaya nag-nobya ako, para hindi naman nila masabing bakla ako.

2 years na ang relasyon naming dalawa pero hindi pa rin niya nalalamang bading ako.

Dati, nang niligawan ko siya, pinlano kong pang-cover up lang talaga siya sa totoong kasarian ko. Pero nang tumatagal na, ay parang nararamdaman kong masaya ako kapag kasama ko siya. Ilang beses na rin na may nangyari sa aming dalawa, at sa katagalan ay napatunayan kong ginagawa ko ito dahil gusto ko at hindi dahil gusto ko lang pagtakpan sa kanya ang kabadingan ko.

Mahal ko na nga siguro siya at nakikita kong gusto ko siyang makasama habang-buhay.

Pero ang problema, attracted din ako sa mga kalalakihan. Hindi ko rin naman gustong umabot sa punto na malaman ng nobya ko na pareho kaming nagkaka-gusto sa mga lalake.

Love Talk, ‘yon na lang ang nakikita kong problema ko sa ngayon, at gusto kong masolusyunan ito sa tulong ninyo. Paano ko po ba maiaalis sa sarili ko ang pagka-gusto ko sa mga kapwa ko lalake?

Sana po ay matulungan ninyo ako sa problema ko. Maraming salamat sa inyong oras.

Umaasa,

“ANTHONY”

Papatulan ba ang ex ng boyfriend?

Dear YES Love Talk,

Isang maganda at pinagpalang gabi po sa lahat ng mga nakiking at bumubuo ng programang YES Love Talk. Itago n’yo na lang po ako sa pangalang “ANGEL”. Sumulat po ako upang humingi ng payo mula sa inyo.

Ako po ay may boyfriend sa ngayon, na tawagin na lang natin sa pangalang “STEPHEN”. Magtatatlong taon na ang aming relasyon.

Masaya naman ako sa relasyon namin ni Stephen. Masaya kami kapag magkasama kami. Pareho kaming naghahanap ng time para sa isa’t-isa. Hindi din kami nawawalan ng komunikasyon. Parang lahat na lang ay perfect sa aming relasyon.

Pero last month, nalaman kong magka-text sila ng kanyang ex-girlfriend. Kinumpronta ko si Stephen, pero sabi niya, wala naman daw ‘yon sa kanya. Nagkataon na nagkita daw sila dito sa isla at nagkamustahan. At dahil nagpapatulong ang kanyang ex na maghanap ng trabaho, nagkapalitan sila ng cellphone number.

Mukhang sincere naman si Stephen sa mga sinasabi niya sa akin kaya pinalipas ko na lang ‘yon. Pero pina-alalahanan ko pa rin siya na huwag lang siyang magkakamali.

Isang beses, magkasama kami ni Stephen na naglalakad sa front beach nang may babaeng tumawag sa kanya. Ipinakilala siya sa akin ni Stephen bilang ‘yung ex niya na nagti-text sa kanya. Nagtatrabaho na siya ngayon sa isang business sa front beach. Nagkamustahan sila at umalis na kami.

Naging madalas din ang kanilang pagkikita dahil nagpapatulong ang ex niya sa kanya na humanap ng malilipatang boarding house at sa pagpa-process ng mga papeles. Parang sa lahat na lang yata ng bagay eh nagpapatulong siya sa boyfriend ko.

Last week inimbitahan kami ng babae na pumunta sa kanyang birthday. Konting kain lang daw. Pumunta naman kami. Nang pauwi na kami ay ayaw pa niya kaming pauwiin dahil kelangan tumagay muna kahit konti daw. Medyo lasing na yung girl at namilit na tumagay kami o kahit si Stephen lang daw. Bilang pakikisama, tumagay din naman si Stephen. Feeling ko parang gumagawa ng move yung girl para landiin ang boyfriend ko. At ang boyfriend ko naman eh parang wala sa sarili at nakalimutan na yatang kasama niya ako. Hinayaan niya lang na landiin siya ng ex niya. Hindi niya pinatulan pero hindi niya rin naman pinigilan. Sa sobrang inis ko, pinilit ko si Stephen na umuwi na. pag-uwi, kinumpronta ko ulit siya, pero sabi niya, nakikisama lang naman daw siya.

Galit na galit ako sa ginawa niya. Gusto ko siyang hiwalayan dahil hinayaan niya lang ang ex niya na landiin siya, pero natatakot naman ako na mawala siya sa akin. Natatakot akong makuha siya ng ex niya.

Love Talk, tama ba na mag-selos ako sa pagwawalang bahala niya sa pang-aakit sa kanya ng ex niya? Hindi naman niya ito pinapatulan pero hindi niya rin pinipigilan. Ano bang dapat kong gawin para hindi mawala si Stephen sa akin?

Love Talk sana matulungan ninyo ako. Sana mabigyan n’yo ako ng payo.

Maraming salamat sa oras at umaasa po talaga ako sa mga advice ninyo.

Lubos na gumagalang,

“ANGEL”

Paano lalayuan ang dating kasintahan?

Dear YES Love Talk,

Magandang gabi sa lahat ng mga sumusubaybay sa programang ito. Marami na kayong natulungan sa pamamagilan ng pagbibigay ng payo, kaya sunulat ako para humingi din ng payo sa inyo.

Itago n’yo na lang ako sa pangalang “EDWARD”, 26 years old. Tatlong taon na akong nagtatrabaho dito sa Boracay.

Naguguluhan ako ngayon sa takbo ng aking buhay pag-ibig.

Proud naman po akong sabihin na hindi naman ako ‘yung tipo ng lalake na pinagsasabay-sabay ang mga ka-relasyon.

May naging girlfriend ako na tawagin natin sa pangalang “JILL”, 21 years old siya ngayon at nagtatrabaho din dito sa Boracay. Kaka-hiwalay lang namin last week, pero naguguluhan pa rin ako sa sitwasyon namin.

Mag-iisang taon na sana ang aming relasyon. Dapat ay mag-iisa’t-kalahating taon na nga, kaya lang, noon ay nag-hiwalay din kami dahil sa mga bagay na hindi namin napagkaka-intindihan. Iba ang prayoridad niya, mas inuna niya ang mga kaibigan niya, at iba din ang gusto kong mangyari sa relasyon namin. Pero naayos din namin ‘yon kaya nagkabalikan kami.

Nagkabalikan kami dahil nangako siyang babawasan na niya ang oras niya sa mga kaibigan niya para magkaroon naman siya ng oras para sa akin. Nangako siya sa akin na gano’n ang gagawin. Hindi din daw niya kayang wala ako, kaya pumayag akong magbalikan kami.

Pero sa mga panahong wala kaming relasyon ni Jill, ay may nakilala akong babae na nagpatibok din sa puso ko. Hindi siya katulad ni Jill, talagang kabaliktaran niya ito.

Niligawan ko siya, pero hindi din ito nagtagal dahil nakukonsensya ako. Parang “rebound” lang kasi ‘yung panliligaw ko sa kanya. Hindi pa talaga ako nakakapag-move on mula kay Jill noong mga panahong ‘yon. Inamin ko ito sa babaeng niligawan ko kaya hindi na din ‘yon natuloy.

Pagkalipas ng ilang panahon, nagkabalikan din naman kami ni Jill. Alam niya ang tungkol sa babaeng niligawan ko. Sabi niya, ayos lang naman dahil hindi naman natuloy ‘yon.

Nasa pang-walong buwan na ang relasyon namin ni Jill pagkatapos naming magkabalikan. Dito ko nalamang nagkaka-lokohan lang pala kaming dalawa.

Noong isang linggo naiwan ni Jill ang cellphone niya sa akin. Alam ko namang babalikan niya ‘yon kaya tinago ko muna. Hindi ko sinasadyang mabasa ang message ng nag-text sa kanya. Sweet ang message ng nag-text sa kanya, kinakamusta siya at nagpapa-alala.

Nang kunin sa akin ni Jill ang cellphone niya, sinabi ko sa kanya na nabasa ko nga ‘yung message ng nag-text. Kinumpronta ko siya, at umamin siya na may iba nga siyang ka-relasyon, at nasa tatlong buwan na daw silang dalawa.

Galit na galit ako sa kanya. Umalis na lang ako dahil baka kung ano pang masabi ko sa kanya. Sinundan niya ako at nanghihingi siya ng sorry at isa pang chance. Pero sabi ko sa kanya, ayoko na. Masyado nang masakit ang mga ginawa niya sa akin.

Isang linggo na niya akong ginugulo sa text, palaging tumatawag, pero hindi ko na pinapansin. Pero minsan sinasagot ko rin ang tawag niya. Isang beses, sinabi niya sa akin na hindi daw siya susuko at ipaglalaban daw niya ang pagmamahal niya sa akin. Sabi ko sa kanya, aasa lang siya sa wala, kaya mas maganda pang makuntento na siya sa bagong karelasyon niya. Pero tuloy pa rin siya sa pagpunta sa akin, nagdadala ng pagkain, tumatawag at nagti-text.

Love Talk, masyado akong nasaktan sa mga ginawa niya sa akin. Hindi na yata maibabalik ng kahit ano pa ang nasirang pagtitiwala ko sa kanya.

Ano bang dapat kong gawin para lumayo na siya sa akin? Kulang na lang ay itaboy ko siya at pagsalitaan ng masakit, at ayokong umabot pa ka kami sa gano’n.

Sana po ay mabigyan n’yo ako ng payo tungkol dito.

Maraming salamat sa oras at pagpapayo. Sana ay tumagal pa ang programa ninyo.

Lubos na gumagalang,

“EDWARD”

Si Jean o si Margaret?

Dear YES Love Talk,

Magandang gabi sa lahat ng mga nakikinig sa programang ito. Sumulat ako dito sa YES Love Talk upang humingi ng payo sa inyo.

Tawagin n’yo na lang ako sa pangalang “ARMANDO”, 28 years old, may isang anak pero hiwalay na sa asawa. Nandito ako ngayon sa isla ng Boracay para magtrabaho para sa aking anak.

May kaibigan ako dito na nakasama ko sa isang inuman. Binigyan niya ako ng textmate. Kilala niya raw ito at may “pinagdaraanan” din daw sa buhay.

Tinext ko ang number na ibinigay niya sa akin at doon ko nakilala si “MARGARET”. Lalo naming nakilala ang isa’t-isa at nahulog ang loob ko sa kanya.

Nang mas nagtagal ay mas lalo ko siyang minahal dahil sobrang bait niya at mahal na mahal niya rin ako.

Pero noong nakaraang buwan ay parang naramdaman kong unti-unti na niya akong napapabayaan at parang iniwanan na niya ako.

May isa akong ka-trabaho na isinama ako dahil magkikita daw sila ng nobya niya. Mayroon din daw itong kasamang kaibigan at ipapakilala daw nila ‘yon sa akin, kaya sumama din naman ako. Doon ko naman nakilala si “JEAN”.

Isang gabi pa lang ang nakakalipas ay naramdaman kong may gusto siya sa akin kaya niligawan ko siya at agad naman niya akong sinagot.

Lumipas ang isang linggo, tinext ako ni Jean na pumunta daw ako sa boarding house niya, kaya pumunta naman ako at doon na ako natulog. Ang hindi ko alam ay tumawag pala si Margaret sa number ko at si Jean ang nakasagot. Nagtalo sila sa cellphone. Kinaumagahan ay nakipag-break sa akin pareho sila Margaret at Jean.

Pero sa totoo lang, mas mahal ko si Margaret. Nagawa ko lang naman ‘yon dahil palagi na siyang walang oras sa akin.

Love Talk, anong gagawin ko para mapatawad na ako ni Margaret? Hindi ko na alam ang gagawin ko.

Maraming salamat Love Talk at sana ay mabigyan ninyo ako ng payo.

Lubos na gumagalang,

“ARMANDO”

Nagsisisi sa pagtitiwalang nawala

Dear YES Love Talk,

Isang maulang gabi sa inyong lahat na sumusubaybay sa programang ito, at siyempre, sa dalawang host ng YES Love Talk.

Napakahirap ng sitwasyon na nabubuhay ka araw-araw na may pinapasang problema sa likod mo, lalung-lalo na kung ikaw ay aminado na ikaw ang may pagkukulang, at araw-araw kang nakukunsensya sa mga ginawa mo dahil araw-araw mong nakikita ang taong tunay na nagmahal sa’yo, pero ginawan mo pa ng kasalanan.

Itago n’yo na lang ako sa pangalan “PAUL”, 28-anyos, kasal, at magdadalawa na ang anak. Nagtatrabaho ako dito sa Boracay at nandito na rin ang panganay namin at ang misis ko na si “MYRA”, na kasalukuyang buntis sa aming pangalawang anak.

Aminado akong naging marupok ako sa tukso sa isang punto ng buhay ko. Pinatulan ko ang aking katrabaho, na itago na lang natin sa pangalang “EMERALD”, at tumagal din ng walong buwan ang aming relasyon.

Kung hindi pa kami nahuli ng misis ko limang buwan na ang nakakaraan ay malamang, hanggang ngayon, ay kami pa ring dalawa ni Emerald.

Buntis na ng tatlong buwan ang asawa ko nang malaman niya ang tungkol sa amin ng aking katrabaho.

Mula nang mabuking kami ni Myra, ay naging parang impiyerno na ang bahay namin. Palagi kaming nagbabangayan. Palagi na lang niyang sinasabi sa akin na hindi na siya nagtitiwala sa akin.

Hindi na nga kami ngayon magkasama sa kuwarto, at kung nangangailangan siya ng tulong, ay mas pinipili pa niyang magpatulong sa kapatid niya na ngayon ay sa amin na din nakatira.

Hinamon na din ako ni Myra ng hiwalayan, pero sustentuhan ko lang daw ang mga anak namin.

Marami nang sinabing masasakit na salita sa akin si Myra, pero kinakaya ko ‘yon lahat, dahil mahal ko siya. Siya lang ang babaeng minahal ko ng ganito, at kaya kong tiisin ang lahat para lang sa kanya, lalung-lalo na at magdadalawa na ang anak namin.

Ilang beses na akong nag-sorry sa kanya sa lahat ng mga ginawa ko, pero paulit-ulit niyang sinasabi sa akin na hindi niya na daw ako pinagkakatiwalaan. Minsan, naiisip ko na’ng mag-suicide para takasan ang mga problema ko, pero naiisip kong kawawa naman ang mag-iina ko kapag ginawa ko ‘yon.

Malapit na ang kabuwanan ni Myra, at natatakot ako na baka pagkatapos niyang manganak ay layasan niya ako dala ang mga anak namin. Hindi ko kakayaning mabuhay nang wala ang mag-iina ko.

Love Talk, anong gagawin ko? Paano ko ba maibabalik ang pagtitiwala sa akin ni Myra? Gusto ko sanang bumalik sa dati ang pagsasamahan namin. Gusto kong maging masaya ulit ang pamilya namin.

Para kay Myra, kung nakikinig ka man, sana patawarin mo na ako. Gagawin ko lahat para lang sa’yo at para sa mga anak natin.

Maraming salamat, Love Talk, at sana matulungan ninyo ako.

Gumagalang,

“PAUL”

Unwanted Pregnancy

Dear YES Love Talk,

Isang mapayapang gabi sa inyong lahat, lalo na sa ating mga taga-pakinig.

Itago n’yo na lang ako sa pangalang “JAMES”, 21 years old, at nagtatrabaho bilang isang security guard sa isang hotel dito sa isla ng Boracay.

Halos mag-iisang taon na ako dito sa isla at dito na rin ako nakahanap ng babaeng minahal ko at nagging bahagi ng buhay ko.

Pero hindi rin kami nagtagal at nagkahiwalay rin kaming dalawa ni “JANE” dahil sa selos.

Magtatatlong buwan na kaming hiwalay at wala kaming communication sa isa’t-isa.

Pero noong June 14, nakatanggap ako ng message sa Facebook mula sa kanya.

Buntis siya at magtatatlong buwan na ang kanyang dinadala, at ako ang ama ng ipinagbubuntis niya. Gusto niyang ipalaglag ang bata dahil takot siya sa mga magulang at kapatid niya. Baka kung ano daw gawin sa kanya kapag nalamang buntis siya.

Kaya ngayon ay humihingi ako ng tulong kung anong dapat naming gawin. Pareho kaming nahihirapan sa sitwasyon naming ito.

Love Talk, anong dapat kong gawin? Kailangan ko talaga ang advice ninyo.

Hanggang dito na lang ang sulat ko. Sana ay matulungan ninyo ako sa problema kong ito.

At sana ay magtagal pa ang inyong programa at ang inyong pagbibigay-solusyon sa mga problema sa buhay at pag-ibig.

Maraming salamat po sa pag-basa sa sulat ko.

Nagmamahal,

“JAMES”

Ang kasalukuyan o ang nakaraan?

Dear YES Love Talk,

Sana ay nasa magandang kalagayan kayo sa pagbasa n’yo sa sulat ko.

Magandang gabi sa lahat ng nakikinig sa programang ito. Itago n’yo na lang ako sa pangalang “Carla”. Isa din ako sa mga gustong humingi ng payo mula sa inyo.

22 years old ako ngayon at dito na nagtatrabaho sa Boracay. May dalawang taong baby boy na ako na nandito din sa isla. Single mom ako. Iniwan ako ng ama ng anak ko nang malaman niyang buntis ako.

Pinalaki ko ng mag-isa ang anak ko. May mga tumulong sa akin, pero hindi ko ‘yon hiningi, kusa nila akong tinulungan. Natuto kasi ako na walang ibang tutulong sa’yo kundi ang sarili mo. At ni piso o dalaw man lang ay hindi nagawa o naibigay ng ama ng baby ko.

Pero may bahagi sa sarili ko na nagsasabing parang hindi ko naman siya masisi noong iwan niya akong nag-iisa sa mga panahong kailangan ko siya. Bata pa kami pareho noon at pareho naming hindi alam ang gagawin.

Hindi na ako nakabalita mula sa kanya mula nang umalis siya… hanggang two weeks ago.

May nag-message sa akin sa Facebook na hindi ko kilala. Alyas lang ang gamit niya at naka-private pa ang pictures niya. Kinausap ko din naman siya. Nakipag-kilala siya sa akin. Kinuha niya ang number ko, na ibinigay ko naman. Naging magka-text kaming dalawa. Bagong kakilala ang turing ko sa kanya.

Nagulat na lang ako nang tinext niya ako na nagso-sorry siya at nagsasabing gusto niyang bumalik sa akin at sa anak ko. Gusto daw niyang mabuo na ang pamilya namin. Akala ko may nanloloko lang sa akin, pero noong nag-share siya sa akin ng picture sa FB, walang dudang siya nga ang ama ng anak ko.

Nasa ibang bansa na siya ngayon at pauwi na dito sa Pilipinas sa October.

Nagdadalawang-isip naman ako ngayon kung tatanggapin ko siya, dahil may boyfriend ako ngayon.

Ang boyfriend ko ngayon ang lalakeng tumanggap sa akin ng buo, kahit na alam niyang disgrasyada ako. Nasa 30s na ang boyfriend ko ngayon pero sa ibang lugar siya nagtatrabaho. Malaki-laki din naman ang kita niya at kaya niyang bumuhay ng isang pamilya. Tanggap niya rin ang anak ko at parang anak na nga din ang turing niya dito.

Love Talk, naguguluhan ako ngayon sa sitwasyon ko. Minahal ko ang ama ng anak ko at pinatawad ko na siya sa mga pagkukulang niya sa amin. Pero minahal din ako ng boyfriend ko ngayon, kahit one year pa lang kami ay tanggap na niya ako.

Anoing dapat kong gawin sa sitwasyong ito? Sana po ay matulungan ninyo ako. Hanggang dito na lang po muna. Maraming salamat sa oras at sa pag-basa ng sulat ko.

Nagmamahal,

“CARLA”

Pagmamahal o pagpapaka-martyr?

Dear YES Love Talk,

Magandang gabi sa lahat ng mga nakikinig at sumusubaybay sa programa ninyo. Isa rin po ako sa mga nakikinig sa inyo kapag may panahon, at matagal ko na ring gustong sumulat sa inyo. Hindi ko po alam kung paano sisimulan ang kuwento ng buhay ko, pero sana ay maintindihan ninyo ito at mabigyan ninyo ako ng payo.

Itago n’yo na lang ako sa pangalang “JANNA”. 28 years old, at nagtatrabaho dito sa Boracay. Dito na ako nanirahan dahil dito ako nakakuha ng kabuhayan at naging maganda ang buhay ko dito, lalo na kung may mga events at kung maraming turista.

Hindi ko ikinakailang bading ako at maraming nakaka-alam ng katauhan ko. Hindi man ako itsurang babae, pero ang puso ko ay puso ng tunay na babae. Ang pakiramdam ko ay pakiramdam ng tunay na babae. Kulang na lang talaga sa akin ay katawan ng babae para maging ganap na babae.

Bilang isang tao, nakakaramdam din ako ng pagmamahal, at ng kasakitan sa buhay.

Dito ko nakilala si “JEFF”. 23 years old siya at isang waiter dito sa Boracay. Siya ang isa sa mga nagpatibok ng puso ko na nanggaling din sa hindi magandang relasyon. Masasabi kong bukod sa guwapo siya ay ma-karinyo siya. Nakuha niya agad ang loob ko nang hindi ko malaman kung pa’no. Basta, tumibok ang puso ko sa kanya.

Hindi nagtagal matapos naming magkakilala ay nagkaroon kami ng relasyon. Naging masaya ako sa kanya dahil naramdaman kong caring siya, inaalala niya ako palagi. Palaging may text, nangangamusta, tinatawagan ako kung OK lang ba ako, kung kumain na ba o kung anong ginagawa ko. Hindi ko kasi ito naramdaman sa dati kong naging karelasyon, at matagal na panahon na ang nakalipas nang huli kong na-experience ito, kaya gusto ko ang feeling na ito. Para akong nananaginip at umaasang sana ay maging forever na ito.

Dahil masaya ako sa kanya, gusto ko ring masaya din siya sa akin. Sabihin na nating lahat ng kelangan at gusto niya, ibinibigay ko sa kanya. Wala akong pakialam kung gagastos man ako o mag-e-effort man ako ng todo. Basta masaya siya, masaya na din ako.

Hindi naman siya nanghihingi sa akin, kusa ko itong ibinibigay. Hindi ko naman masasabing naging masyado nang malaki ang ibinibigay ko sa kanya, pero kahit papano eh may halaga din naman ito. Hindi naman ako naniningil sa kanya, basta nakikita kong kailangan niya o gusto niya, ibinibigay ko nang walang kapalit.

Hindi naman siya nagbabago sa akin sa pakiramdam ko. ‘Yun nga lang, hindi kami gano’n ka-lantad sa publiko. Ayoko din kasing pinagtitinginan kami ng tao, at gano’n din naman siya.

Pero noong summer, nalaman kong may girlfriend siya. Hindi ko sinabi sa kanya na alam ko, pero siyempre, nasaktan ako. Pero pinilit ko na lang na intindihin na may mga bagay na maibibigay ang isang tunay na babae na hindi ko kayang ibigay. Nagpatuloy pa rin ang relasyon namin.

Na-realize ko na lang na unti-unti nang kumukonti ang time niya para sa akin, pero hindi naman nawawala ang communication. Gano’n pa rin siya, caring pa rin sa akin, kumukonti na nga lang ang time. Medyo lumalaki din ang mga naibibigay kong halaga sa kanya dahil pasukan na nga din at kelangan daw ng kanyang mga kapatid. Hindi naman gano’n kalaki ang kinikita niya at alam kong mahirap lang sila. At dahil kelangan niya, ibinibigay ko din naman sa kanya ng walang  paniningil pero may kasamang panalangin na sana ay hindi siya magbago sa akin, na sana ay mahal niya talaga ako bilang ako at hindi dahil sa kaya kong magbigay sa kanya. Nasa 6 months na ngayon ang relasyon namin.

Love Talk, alam kong naging mabilisan ang relasyon namin. Natatakot akong dahil mabilis na naging kami ay mabilis din na mawawala ang kung anumang meron kami. Alam kong p’wede kaming dumating sa ganitong situwasyon, pero natatakot pa rin ako na baka iwanan niya ako kapag hindi ko na kayang magbigay sa kanya at kung hindi ko na maibibigay sa kanya ang mga kailangan niya at gusto niya.

‘Yan din siguro ang rason kung bakit nagbubulag-bulagan ako na meron siyang iba para lang hindi niya ako iwanan. Masarap ang pakiramdam na alam kong nand’yan siya. Secured ako kapag magkasama kami. Pero kung magkalayo na kami, marami na akong nararamdamang duda at pagdadalawang isip sa kung anong meron sa relasyon namin at kung anong takbo ng relasyon namin.

Minsan, naiiisip ko na parang masyado ko nang ibinababa ang sarili ko, para lang makuha ang kasiyahang gusto ko. Pero naiisip ko na ginusto ko din naman ito kaya wala akong ibang masisisi kundi ang sarili ko.

Love Talk, masasabi n’yo bang nagiging abusado na siya sa relasyon namin? O masyado lang ba talaga akong nagpapaka-martyr sa kanya? Dapat ko pa bang ipagpatuloy ang ganitong klaseng relasyon? O dapat ko na ba itong putulin, kahit na masaya ako sa kung anong meron kaming dalawa?

Hanggang dito na lang po ang kuwento ko. Maraming salamat sa pagbasa ng sulat ko Love Talk. Sana ay matulungan ninyo ako sa aking magiging desisyon.

Nagmamahal,

“JANNA”

Pera ang problema

Dear Yes Love Talk,

Mainit na gabi sa inyong lahat. Hindi na ako magpapaliguy-ligoy pa. Sumulat ako para subukang humingi ng payo mula sa inyo.

Tawagin n’yo na lang ako sa pangalang “VIRGILIO”, nagtatrabaho dito sa Boracay. Dito ako pinalad na makapag-trabaho dala na din ng kursong tinapos ko.

Maraming babae na akong nakilala at naka-relasyon. Pero mukhang sa isang babae lang talaga ako tinamaan. Tawagin natin siya sa pangalang “KAREN”.

Mula sa pagiging barkada ay naging magka-relasyon kami. Mahigit isang taon na ang relasyon namin. Magka-live in na din kami. Pareho kaming nagtatrabaho sa mga resort.

“Cowgirl” ang dating ni Karen. Ok lang mapa-tagay sa tindahan o sa bar man. Ganu’n daw ang rason kung bakit nabuntis siya sa maagang panahon. Ngayon, may anak siyang babae, 6 years old, at nasa pangangalaga ng nanay niya sa Manila.

Mag-isa niyang binubuhay ang anak niya dahil hindi naman siya pinanagutan ng naka-buntis sa kanya. Kasama sa pagpapadala niya para sa anak niya ay nagpapadala din siya ng para sa nanay niya. Hindi din naman kasi sumasapat sa kanila ang sinasahod ng tatay niya bilang construction worker. Nakatira din sa kanila ang dalawa pa niyang kapatid na may pamilya na din.

Pero ok lang din ‘yun sa ‘kin. Tanggap ko siya bilang siya at tanggap ko kung anong meron at wala sa kanya.

Pero may isang bagay lang na gumugulo sa isipan ko. Minsan kasi, inamin niya sa akin na may iba pa siyang ka-relasyon, isang foreigner na nakilala niya din dito sa Boracay.

Nagalit ako nang malaman ko ito. Medyo matagal na rin naman ‘yun nu’ng sinabi niya ‘to sa’kin. Pero sabi niya, ako ang mahal niya at hindi ‘yung foreigner na ‘yon. Kaya hanggang ngayon, kami pa rin ni Karen.

Mas nauna silang nagka-relasyon kesa sa aming dalawa. Nagpapadala din sa kanya ang foreigner na ‘yon kaya nakakaya din niyang mag-bigay ng malaki-laki sa pamilya niya. Pero dati ‘yon.

Ngayon, medyo nagigipit si Karen dahil lumiit ‘yung pinapadala sa kanya ng foreigner. Tapos nagkasakit pa ‘yung tatay niya sa kidney. At maglo-low season na din dito sa isla. Minsan nagbibigay din ako sa kanya, pero hindi talaga kaya dahil ako na din ang gumagastos para sa tinutuluyan namin at sa iba naming mga gastusin dito para lang maipadala niya ng buo ang pera niya sa pamilya niya.

Ipina-alam niya ang kalagayan niya sa foreigner.  Sabi ng foreigner sa kanya, magpakasal na lang daw sila para mapa-dali ang pag-punta niya sa ibang bansa para makapag-trabaho at kumita ng mas malaki kesa sa kinikita niya dito. Mahal naman daw siya ng foreigner kaya hahanap siya ng paraan para mas mapadali ang pag-hanap niya do’n ng trabaho.

Pero hindi mahal ni Karen ‘yung foreigner. Minsan, umiiyak siyang nag-kuwento sa akin na ako lang ang mahal niya, na ayaw niyang magkalayo kaming dalawa.

Kaya lang, lumalala ang sakit ng tatay niya at kelangan na din ng pang-gastos ng anak niya sa eskwelahan. Naka-private school ang anak niya ngayon kaya medyo malaki ang bayarin.

Last week, nagdesisyon siya. Tatanggapin daw niya ang alok nu’ng foreigner pero gusto niya na maging magkaibigan pa rin kami. Nangako siya na babalik kapag naayos na niya ang problema niya sa pera.

Naguguluhan ako ngayon. Hindi na ako sigurado sa relasyon namin. Mahal ko naman siya. Nagkataon lang na pera ang problema. Aminado akong kung mga kinikita lang namin ang aasahan namin, hindi talaga kakayanin, lalo na sa kalagayan niya sa ngayon.

Ayokong mawala siya sa akin. Gano’n din ang sabi niya sa akin. Ramdam kong totoo ang sinabi niya sa’kin na ayaw niyang mawala ako sa kanya, kaya nga ayaw niyang mawala ang komunikasyon namin.

Kung ikaw ang nasa ganitong sitwasyon, anong gagawin mo? Nalilito na kasi talaga ako. Sana naman tulungan n’yo ako. Maraming salamat sa pakikinig sa kwento ko at sa mga payo ninyo.

Nagmamahal,

“VIRGILIO”

Bawal na pag-ibig

Dear YES Love Talk,

Magandang gabi Ate Gina at DJ Fiona. Thank you sa pag-basa nitong sulat ko. Ako si “ROSE”. May 3 years old na anak ako pero hindi kami OK ng tatay niya. Minahal ko siya, ibinigay ko ang lahat, pero mukhang hindi pa rin ito naging sapat.

Unti-unti, nakalimutan ko siya, dahil may isang “DEREK” akong nakilala. Matiyaga siya, at pinahahalagahan ako, at sobrang na-appreciate ko ‘yon. Mahal niya ako at mahal ko rin siya. Kaya lang, sa pangalawang pagkakataon na nagmahal ako, doon pa ako napunta sa sitwasyong komplikado. May asawa siya, kasal at may dalawang anak. Sabi niya, hindi daw niya kayang mawala ako sa buhay niya at nawala na daw ang pagmamahal niya sa asawa niya. Nagkataon na kaibigan ko pa ang asawa niya at malapit sa akin ang pamilya at anak niya. Sa tuwing nakikita ko ang kabutihan nila, parang hindi ko kayang manira ng pamilya.

Naguguluhan ako dahil nagmamahalan kami kahit alam namin na mali ang ginagawa namin at marami kaming masasaktan at maaapakan, lalo na kapag nalaman ng asawa niya na ako ang dahilan ng magiging pagkasira ng pamilya niya… ako pa na inaakala niyang isang kaibigan.

Hindi ko na alam ang gagawin ko, naguguluhan ako. Nagmamahalan kami kahit na alam naming mali. Mahal ko siya, mahal niya ako, pero kasal siya at pagmamay-ari siya ng iba. Dapat ko ba siyang ipag-laban kahit na alam kong mali? O palalayain ko na lang ba siya kahit na alam kong siya na lang sana ang kulang sa buhay ko?

Sana ay mabigyan ninyo ako ng karagdagang payo para mabawasan naman ang sakit na nararamdaman ko at ang mga iniisip ko. Pagkatapos nito, kapag narinig ko na ang mga opinyon ninyo ay magmo-move on na ako. Sana lang makayanan ko ito.

Maraming salamat, Love Talk, Gina Marina at DJ Fiona. Please play the songs “Kung Malaya Lang Ako” ni at “Gusto Kita” for me DJs.

Nagmamahal,

“ROSE”

Torn between two choices

Dear YES Love Talk,

Magandang gabi po sa inyo at sa lahat ng nakikinig ng YES Love Talk. Tawagin niyo nlang ako sa pangalang "SHA-SHA". Ako ay taga-Caticlan. 18 yrs old na ako ngayong araw, May 18. Nag-aaral ako sa isang pribadong paaralan sa kalibo. Sa ngayon po my boyfriend ako, pinsan ng bestfriend kong lalaki.

Ako po yong tipo ng babaeng bihira lang makipagkaibigan sa mga babae kasi mas nakakasundo ko pa yong mga lalaki. Alam ni mama lahat ng ito at tanggap ‘yun ng buong family namin. Ok naman lahat sa amin.

Naging problema ko lang ‘yung bestfriend ko na tawagin n’yo na lang sa pangalang “PAUL”. 5 years na kaming mag-bestfriend. 1st year high school kami n’ung magkakilala kami ni Paul. 1st year pa lang kami, usap-usapan na sa school namin na may gusto s’ya sa’kin pero di ko na lang pinapansin ‘yun dahil pinapakita ko na mas mahalaga sa ‘kin yung friendship namin kaysa sa mga ganong bagay.

Hanggang sa umabot ng isang taon kaming magkaibigan, nagkaroon kami ng usapan na walang ligawan at iwanan na mangyayari sa ‘min. Nangako naman s’yang hindi n’ya ako mamahalin na higit pa sa kaibigan at hindi n’ya ako iiwan kahit anong mangyari.

Naging matibay pagkakaibigan namin, marami na kaming pinagsaluhan na lungkot, tagumpay at saya kasama ang mga barkada kong lalaki. Pero habang tumatagal, feeling ko, mas lalong nagkakagusto s’ya sa akin. Gumawa ako ng mga bagay na di n’ya gusto para ma-turn off sya sa’kin tulad ng sumubok akong mag-smoke, magpaka-boyish, and lastly, nakipag-boyfriend ako, pero talagang gumawa s’ya ng paraan para iwasan ko ang mga bagay na ‘yon. Naging OK ulit kami hanggang sa makapagtapos kami ng 4th year.

Nag-aral ako ng college pero s’ya hindi na. Nag-stop sya dahil sa financial problem. Within 1 year ko sa college, nawalan kami ng communication pero nakikibalita pa rin ako sa kanya ng di nya alam.

Sa ngayon meron na ulit kami ng communication ni Paul pero patuloy pa rin s’yang pagpaparamdam na mahal n’ya ako. Nahihirapan na ako sa pagpapakita sa kanya na di ako apektado at wala akong alam sa kanyang nararamdaman sa akin. I can’t deny na napamahal na rin sya sa akin pero may pangako kaming pinanghahawakan na di dapat masira, and most of all, may boyfriend ako, ayoko din kasi na maging unfair ako sa kanya.

At same time ayoko din na nasasaktan bestfriend ko. Lagi n’ya kasing sinasabi na sana hindi na lang s’ya nangako at sana daw sinabi n’ya na lang ‘yung totoong nararamdaman niya noon pa, pero pilit ko pa rin ‘yon tinatakasan at idinadaan ko lang lahat sa biro at kalokohan.

Mga ate, ano ba gagawin ko para di ko masaktan bestfriend ko at boyfriend ko? Sobrang nahihirapan ako tuwing nagkikita kaming tatlo sa isang sitwasyon. Mahal na mahal ko boyfriend ko pero ayokong masaktan at mawala bestfriend ko.

Sana matulungan n’yo ako. Thank you po sa pag-share ng teenage story ng buhay ko. Sana ay mai-play n’yo na sin ang songs na “Pusong Lito” at “Paano na Kaya”. Thank you and more power po sa program nyo.

Love,

SHA-SHA

Maling pagkakataon

Dear YES Love Talk,

Naniniwala akong sa pagmamahal, dapat sundin ang puso. Pero paano mo sundin ang puso mo kung marami naman ang masasaktan mo?

Magandang gabi sa lahat ng nakikinig sa programang YES Love Talk. Tulad ng mga sumusulat sa inyo, gusto ko rin sanang humingi ng payo mula sa inyo.

Itago n’yo na lang ako sa pangalang “AMY”. 25 years old, single, at dito na nakakuha ng trabaho sa Boracay mula nang umalis ako sa amin dalawang taon na ang nakakaraan. Umalis ako dahil sa kagustuhang hindi na makasakit ng mga taong minamahal ko, pero pilit pa rin akong sinusundan nito.

Si “JOY” ang maituturing kong best friend ko mula noong mga bata pa kami hanggang sa lumaki kami. Magkasama kami sa halos lahat: sa school, sa laro, sa lahat-lahat na. Para kaming magkapatid. Since nag-iisa lang siyang anak, at ako naman ang bunso at dalawa lang naman kami ng kuya ko, para na talaga kaming “sisters”.

Noong nag-college na kami ni Joy, nagkakilala sila ni “LESTER”. Niligawan siya ni Lester at hindi nagtagal ay sinagot naman siya ni Joy. Kapag nag-aaway silang dalawa, ako ang pinagsusumbungan nila pareho. Ako din ang tagapagpa-bati nilang dalawa. At kapag si Lester ang sumusuyo kay Joy, ako ang tulay.

Pagka-graduate sa college, pumunta si Joy sa Manila para sa licensure exams. Si Lester, naiwan sa college dahil medyo may pagka-bulakbol. Kami ni Lester ang madalas na nagkakasama dahil parang barkada na din kami.

Noong mga panahon ding ‘yon, nag-break kami ng boyfriend ko. Si Lester ang naging hingahan ko ng mga nararamdaman ko, lalo na ng mga heartaches ko. Hindi ko namalayan na unti-unti na akong nahuhulog sa kanya. At parang gano’n din siya sa akin.

Hindi din kami nakaiwas sa tukso. Dumating ang time na may nangyari sa amin na hindi dapat mangyari. Hindi naman ito nagbunga, pero hindi din namin ito sinabi kay Joy. Pinilit naming hindi na maulit ito, pero hindi din namin ‘yon natupad.

After a month mula ng may nangyari sa amin ni Lester, bumalik na si Joy sa lugar namin. Para hindi na ako makasakit, umalis ako sa amin, kahit na alam kong masasaktan ako. Pumunta ako sa iba’t-ibang lugar, nagpalit ako ng number, nakipag-relasyon sa iba at nakipag-kalas din, inaliw ko ang sarili ko para lang makalimutan ang lahat, hanggang napadpad ako dito sa Boracay.

Akala ko, OK na ako after 2 years, pero hindi pa pala.

2 weeks ago, hindi sinasadyang nagkita kami ni Lester dito sa isla. Nagka-kamustahan, nagkuwentuhan. Engaged na sila ni Joy, tulad din ng sinabi sa’kin ng best friend ko. Si Joy ay nasa Manila at nag-aasikaso ng business nila, si Lester naman ay nandito sa Boracay para din sa business nila. Si Joy daw ay hahabol na lang by the next week dahil may mga inaasikaso pa siya sa office nila. Marami kaming napag-kuwentuhan sabay tagay.

Pag-uwi, nalasing kami, and I ended up sa place niya. Something happened again sa aming dalawa. Kinaumagahan, nagmamadali akong umalis from his place, pero pinigilan niya ako. Sabi niya, matagal daw niya akong hinanap and ngayon daw na nakita na niya ulit ako, hindi na daw niya ako pakakawalan. He is willing to give up his engagement for me.

Umuwi akong naguguluhan. Since then, hindi na ako nagpakita kay Lester o kay Joy kahit na nagtampo pa siya sa akin. Si Lester nandito pa rin sa isla, nakikita ko siya pero iniiwasan ko siya dahil ayokong ako ang maging rason kung bakit sila maghihiwalay ni Joy. Pero deep inside, I want him.

Love Talk, anong dapat kong gawin? Mahal at minahal ko din si Lester, at hanggang ngayon ay gano’n pa rin ang nararamdaman ko sa kanya. Ramdam kong gano’n din siya sa akin. Pero paano na lang si Joy? Naguguluhan na talaga ako. Dapat ko pa rin bang sundin ang sinasabi ng puso ko, o dapat ko bang kalimutan ito? Ano nga ba ang dapat at tama kong gawin? Sana naman ay mapayuhan ninyo ako.

Maraming salamat sa inyo na nakinig at sa pagbibigay ng oras sa sulat ko. Umaasa ako sa payo ninyo.

Gumagalang,

“AMY”