Paano aayusin ang buhay?

Dear YES Love Talk,

Mainit na gabi sa lahat ng mga nakikinig sa YES Love Talk at sa dalawang anchors nito.

Una sa lahat, hinihiling ko po na sana ay huwag kayong mahiyang mag-bigay ng kahit anong komento o suhestiyon sa aking isasangguni ngayong gabi dahil lahat po ng mga sasabihin ninyo ay buong puso kong tatanggapin.

Tawagin n’yo na lang ako sa pangalang “ROSELLA”. Ako ay 21 years old, at sa kabutihang palad ay hindi pa nabubuntis o nadidisgrasya dahil sa mga pinag-gagagawa ko sa buhay ko.

Galing ako sa isang broken family. Tatlo kaming magkakapatid, ako ang pangalawa. Ang tatay ko ay umalis sa amin noong Grade 4 ako. Sabi ng nanay ko, magtatrabaho lang daw ang tatay ko. Pero ako mismo ang nakakita na may ibang babae at bata siyang kasama, kaya mula noon ay hindi na ako naniwala sa nanay ko.

Ang nanay ko, noong umalis ang tatay ko, ay nagdala din ng lalake sa bahay namin. Hindi niya kami itinuring na mga anak, at ang nanay ko ay hindi din naman ganoon ka-maalaga. Kaya nang nakapag-tapos ako ng high school ay umalis na ako sa amin.

Pero bago pa ako umalis sa amin ay nauna na sa akin ang ate ko na umalis ng bahay. Maaga siyang nabuntis kaya maaga din siyang nakapag-asawa.

Naiwan ang kapatid kong bunso, isang lalake, sa puder ng nanay ko.

Nang umalis ako ng bahay, naki-tira ako sa tiyahin ko na nasa side ng tatay ko. Pinag-aral nila ako sa college kapalit ng pag-tulong ko sa kanila sa bahay.

Tiniis ko ang trato nila sa akin na parang yaya ng mga pinsan ko at katulong sa bahay para lang makapag-aral.

Kahit kinukulang, pinagkakasya ko na lang din ang binibigay nila sa akin.

Dahil na rin sa kakapusan ng pang-gastos at dahil na rin sa may bahagi ng sarili ko na gustong mag-rebelde, naging madalas ang pagtanggap ko ng pabor mula sa mga kabarkada ko kapalit ng pera.

Kapag may mga projects, ako ang gagawa, babayaran nila ako.

Nagiging kasama na din ako sa mga galaan, nagkakaroon ng maraming kakilala, at kasabay nito ay natututo ng bisyo na sila naman ang tumutustos. Kung baga, nakikisabay ako sa kanila.

Pati mga gawaing hindi ko dapat na ginagawa, ay nagawa ko.

Naranasan kong mang-agaw ng nobyo ng may nobyo.

Nagawa ko na din na makipag-relasyon ng sabay-sabay.

Nakipag-relasyon na rin ako sa matanda, naging kabit na din ako para lang may pang-gastos ako sa iskwela.

Nakasira na rin ako ng pamilya, at mahigit sa isang beses ko nang nagawa ito.

Ngayon, nandito ako sa Boracay para sa trabaho, pero ang tinutuluyan ko dito ay binabayaran ng ka-relasyon kong may pamilya na din na nasa ibang lugar, at hindi niya alam na hindi lang siya ang ka-relasyon ko sa ngayon.

Love Talk, parang hinahayaan ko na lang na sirain ko ang sarili ko kasi parang wala na rin namang patutunguhan ang buhay ko. Ilang beses ko nang sinubukang magpakamatay, pero nauunahan ako ng kaba at takot at ng pagiging duwag ko.

Sawa na ako ngayon sa buhay ko. Parang wala na itong silbi. Marumi ang tingin ko sa sarili ko. Alam kong maraming taong ginawan ko ng kasalanan na hindi ako mapapatawad kahit lumuhod pa ako o iyakan ko sila.

Love Talk, may pag-asa pa bang maayos ang buhay ko? Anong dapat kong gawin? Saan ako magsisimula? Sa sobrang gulo ng buhay ko, hindi ko na makita kung anong magandang mangyayari sa akin. Parang hindi din naman ako deserving na mabigyan ng blessings o ng kung anumang maganda.

Love Talk, sana ay mabigyan ninyo ako ng payo kung paano ko maaayos ang buhay ko.

Maraming salamat sa inyong oras. Sana ay may matutunan din kayo sa kuwento ko.

Gumagalang,

“ROSELLA”

Paano makikisama sa mga manugang?

Dear YES Love Talk,

Pagbibigay galang po sa lahat ng nakikinig sa programang ito ngayong gabi, isang napakagandang gabi po sa lahat.

Tawagin ninyo na lamang ako sa pangalang “ROBERT”, 32 years old at taga Aklan lang din.

May asawa na po ako, pero hindi ko alam kung saan ako lulugar sa ngayon, at iyon ang bagay na nagpapabigat sa dibdib ko.

Almost 2 years na po kasi akong nawalay sa asawa ko Love Talk, kasal kami at may isang anak na 3 years old na ngayon.

Nasa mga magulang ko ngayon ang bata, dahil hindi ko rin pwedeng isama dito sa Boracay sa trabaho ko.

Ang asawa ko ay isang registered nurse sa labas ng bansa at ako ay hamak na driver lamang sa isang resort dito sa Boracay.

Financially, masasabi kong wala kaming problema at lahat ng material na bagay ay naibibigay namin sa aming anak.

Pero ang problema po Love Talk ay ang trato sa akin ng mga biyenan ko, na animo ay mabigat ang loob nila sa tuwing nakikita ako.

Kung ako lang ang tatanungin, wala akong nagawang pagkakamali sa kanila at sa asawa ko, maliban na lamang sa pagmamahalan namin ng anak nila na noon pa man ay hindi na sila boto sa akin dahil under grad lang ako sa Nursing.

3rd year na kasi ako noon nang tumigil ako sa pag-aaral para makapag-aral din ang nakakatanda kong kapatid dahil hindi kaya ng magulang ko na dalawa kami sa kolehiyo at may dalawa pa akong kapatid na nasa high school.

Ngunit noong may pagkakataon ko nang mag-aral, nawalan na ako ng gana dahil naiwan na ako ng mga kaibigan ko.

Noong college, doon ko nakilala ang asawa ko at nagsimula na nagging kami noong nasa 2nd year college kami.

Napatunayan ko naman na mahal niya ako, dahil kahit tumigil ako sa pag-aaral naging faithful siya sa akin at ako pa rin ang pinili niyang pakasalan.

Hanggang  sa nagka-anak kami at nag-abroad siya.

Love Talk, sa unang anim na buwan niya doon ay naging OK ang lahat, madalas ang tawagan at nag-uusap din kami kapag nakakapag-online kami sa internet.

Kahit hanggang ngayon ay nanatiling may komunikasyon kami, pero hindi na ganoon kaladalas, kaya minsan para may pagdududa na sa isip ko na baka pa-unti-unti ay nakakalimutan na niya ako.

Pasalamat na lang ako at nakapagtrabaho ako dito para mayroon namang paglalaanan ng oras.

Isang beses sa isang linggo ay umuuwi ako sa amin para sa anak ko, dahil may tiwala ako sa mga magulang ko na maaalagaan nila ang anak namin ng asawa ko.

Kaya lang Love Talk, may pagkakataon na nakakarinig ako ng mga kwentong hindi tanggap ng tenga ko gaya na lang ng palamunin lang dae ang pamilya ko ng anak nila, kesa sa ang sahod ko ay maliit na halaga lang daw kumpara sa kinikita ng anak nila.

Pero ang totoo, hindi naman kami umaaasa sa padala ng asawa ko kasi ang mga kapatid ko may trabaho at siyang bumubuhay sa mga magulang ko.

Dati, noong wala na dito ang asawa ko, sinubukan ko din na tumira sa kanila ng halos tatlong buwan, pero ramdam ko na mukhang hindi ako welcome sa kanila kaya naiisip ko na lang na magtrabaho dito.

Sa ngayon ay gusto pa nilang kunin ang bata sa amin at kung p’wede daw ay doon na diretsong ibigay ang padala ng misis ko sa kanila kahit na mayroon naman silang parte sa sahod ng asawa ko na dumidiretso sa account nila.

Kaya nga din nagtrabaho ako para kahit sa sarili ko ay mayroon din akong maibibili at hindi na i-a-asa lahat sa asawa ko.

OK naman sana sa akin na ganoon, pero ang ayoko ay nandu’n ang anak ko sa kanila dahil takot ako na maturuan nila ang bata ng kamuhian ako kahit wala akong ginagawa.

Inaaamin ko din naman na hindi kakayanin ng sahod ko lang na ibigay ang lahat ng bagay sa anak ko habang lumalaki siya, kaya kahit paano ay kailagan ko pa rin ng tulong ng asawa ko, kahit maliit na halaga lang.

Pero dahil sa parang pera ang ugat ng lahat, sinabi ko na sa asawa ko na sa kanila na lang ibigay ang pera at kung anong meron ako at ang pamilya ko, ‘yon na lang ang pagkakasyahin namin.

Pero hindi pumayag ang asawa ko dahil sa kami na nga daw ang pamilya niya, lalo pa at may anak na kami, na talagang ipinagpapasalamat ko dahil pinagkakatiwalaan niya ako at ang pamilya ko.

Love Talk, paano ko po sila pakikibagayan, kasi parang hanggang ngayon ay ayaw pa rin nila sa akin?

Ibibigay ko ba ang anak ko sa kanila?

Kailangan ko din bang lumabas ng bansa para tapatan ang kita ng asawa ko?

Humihingi din po ako ng payo, kung paano ko ima-maintain ang relasyon naman ng asawa ko kahit malayo kami sa isa’t isa.

Maraming salamat sa paglalaan ng oras sa sulat ko at sana ay magtagal pa ang programang ito.

Umaaasa ng inyong advise,

“ROBERT”

Komplikado

Dear YES Love Talk,

Magandang gabi po sa lahat ng nakikinig sa programang ito at sa istasyong ito. Isa ako sa mga nakikinig sa programa ninyo tuwing may pagkakataon ako, at ang mga payo ninyo sa mga sumusulat sa inyo, minsan, ang nagiging basehan ko sa mga desisyong ginagawa ko. Hindi lamang kasi ito applicable sa mga problemang pag-ibig kundi pati na rin sa mga pang-araw-araw na pagdedesisyon. At ngayon gabi, ako naman po ang hihingi ng tulong sa inyo.

Tawagin n’yo na lang po ako sa pangalang “MARJORIE”, 25 years old, at nagtatrabaho dito sa Boracay. Single pa naman ako, walang anak, wala na ring iniintindi kundi ang future ko na lamang, dahil maliban sa malabo ito, eh parang magulo din po ito.

High school pa lang ako na’ng nagkaroon ako ng boyfriend. Dahil sa kabataan, inasahan kong magiging parang fairy tale ang kwento ng pag-ibig namin ni “JEFFREY”. Akala ko magtatagal na kaming dalawa. Pero nang mag-3rd year college kami, nagkahiwalay kami. Parang nag-fall out of love na lang kami dahil siguro sa nag-iba na ang interes namin pareho at dahil sa iba na rin ang ginagalawan namin. Naging magkaibigan naman kami, hanggang sa nang nag-graduate na kami, ay nawalan na rin kami ng personal na komunikasyon sa isa’t-isa. Pareho kaming nagkaroon ng iba pang mga ka-relasyon pagkatapos naming mag-hiwalay na dalawa.

4 years ago, napunta ako dito sa Boracay para mag-trabaho. Pangalawang taon ko dito sa island nang maging boyfriend ko si “ROMEO”. Ngayon, 2 years na ang relasyon namin pero parang nagkaka-labuan na naman kami. Palagi kasi siyang busy sa trabaho, o kaya palaging pagod. Parang hindi ko na din siya naiintindihan kasi ako na nga ang gumagawa ng adjustments para magkaroon lang kaming dalawa ng oras para sa isa’t-isa pero mas pinipili pa niyang matulog kaysa sa makipag-usap sa akin. Hindi ko alam kung masyado lang talaga akong negative mag-isip o there’s something wrong na talaga sa relasyon namin. Kaya parang nagfa-fall out of love na ako sa kanya.

This March, nagulat ako nang may tumawag sa aking lalake habang naglalakad ako sa front beach. Hindi ko siya agad nakilala, pero it was Jeffrey. Naka-bakasyon siya dito sa Boracay and medyo magtatagal siya dito dahil na-miss na daw niya ang Pilipinas. Kabababa lang daw niya ng barko. Na-gulat ako na na-excite dahil nakita ko siya ulit. Hindi niya din daw in-expect na dito pa kami sa Boracay magkikita. Nagkakuwentuhan kami, inalala ‘yung mga high school and college days namin. Lumabas kami ng ilang beses for a friendly date. Nalaman ko na nagkaroon siya ng anak pero hindi sila kasal ng naanakan niya. Hindi kasi boto sa kanya ang mga magulang ng nobya niya. Nag-tanan daw sila pero ngayon palagi na silang nag-aaway at palaging sinasabi ng babae na sana ay hindi na lang daw siya sumama kay Jeffrey. Nagiging malabo na din daw silang dalawa. Ako naman, ikinuwento ko din sa kanya ang naging takbo ng love life ko. Nagkapalitan kami ng contact numbers at parang walang nag-iba sa pagiging magkaibigan namin. Ilang araw pa ang lumipas at bumalik na siya sa lugar namin. Hindi ko man ipinaramdam sa kanya pero feeling ko, may something na nawala sa akin sa pag-alis niya dito sa Boracay.

Ilang araw ko din na inisip na ano kaya ang buhay ko kung hindi kami nagkahiwalay ni Jeffrey. Inaamin kong parang may kung anong pakiramdam na nabuhay sa’kin. Pero hindi ko ito sinabi sa kanya.

Nakita ko din na nag-e-effort na si Romeo sa relasyon namin. Nagiging OK na ang lahat, pero parang nawawala na ang nararamdaman kong pagmamahal sa kanya. One night, nagtext sa akin si Jeffrey. Sabi niya, miss na daw niya ako. Ilang sunud-sunod na love quotes din ang pinasa niya. Sabi ko sa kanya, “Ano ‘to?”. Sabi niya sa akin, “Kung anong nababasa mo, ‘yun na ‘yon.” Sinabi niya din na sana isinama na lang daw niya ako sa pag-alis niya dito sa Boracay. Sa susunod daw, hindi na daw niya ako iiwan. Tinanong ko siya kung lasing siya, pero hindi naman daw. Ilang araw din na gano’n ang mga messages niya sa akin pero hindi ko ini-entertain. Pero sa totoo lang, parang gusto ko na ding mag-“I love you, too” sa kanya, ayoko nga lang kasing magkamali sa pagkakataong ito.

Love Talk, sobrang gulo ng utak ko ngayon. Napaka-komplikado ng sitwasyon ko sa tingin ko. And’yan ‘yung taong mahal ko at mahal niya ako pero nagkakalabuan kami, at ‘yung taong dati kong minahal na ngayon ay nagbabalik at nagsasabing mahal niya ako, pero parang huli na kasi may iba ‘nang nagmamahal sa kanya at may komplikasyon pa sa relasyon nila.

Love Talk, anong dapat kong gawin? Payuhan n’yo naman sana ako. Alam kong komplikado ang kuwento ko pero malaking bagay po na matulungan n’yo ako.

Maraming salamat sa oras ninyo at sa pagbasa ng sulat ko. More power sa inyo at sa YES FM.

Umaasa,

“MARJORIE”

Paano ibabalik ang nasirang pag-ibig?

Dear YES Love Talk,

Magandang gabi sa lahat ng mga nakikinig sa programang ito at sa YES FM.

Pinag-isipan ko pong mabuti ang problemang ito habang nagbabakasyon para sa Semana Santa, at sa pakiramdam ko, habang ginigunita natin ang pagpapakasakit ng Panginoon noon ay nagpapakasakit din ako habang naaalala ko ang mga suliranin ko.

Itago n’yo na lang ako sa pangalang “IRMA”. Ako ay 26 years old, may dalawang anak sa dalawang lalake.

Ang una ay ang lalakeng inibig ko ng lubusan. Itago na lang natin siya sa pangalang “JAMES”. Naging matagal din ang aming relasyon, sobra anim na taon. Dahil sa mga nakaw na sandali ay nagbunga ang aming pagmamahalan. Tatlong taong gulang na ang anak naming dalawa.

Dalawang taon na ang nakakaraan nang pumunta siya sa ibang bansa para magtrabaho. Hindi siya nagkulang sa suporta at sa pagkamusta sa amin ng anak namin. Ang plano, pagbalik niya dito ay magpapakasal na kami.

Pero alam ko na nagkaroon ako ng mga pagkukulang. No’ng mga panahong ‘yon na wala siya dito ay parang palagi na lang ako naghahanap ng away. Palagi ko siyang inaaway. Kahit mga maliliit lang na mga bagay pinapalaki ko. Palagi kaming may mga ‘di pagkaka-intindihan.

Sa mga panahong ‘yon, ang naging takbuhan ko ay ang mga barkada ko. Isa sa mga barkada kong lalaki, na taawagin nating si “REX”, ang talagang naging ka-close ko. Kasama sa inuman, lakaran, sa lahat-lahat. Hanggang sa may nangyari din sa amin at nagbunga ito, ang pangalawa kong anak na mag-iisang taong gulang na sa susunod na buwan.

Nalaman ni James sa ibang tao ang tungkol kay Rex at sa amin. Abot langit ang paghingi ko ng tawad sa kanya, pero walang nangyari. Sinabi niya sa akin na masakit ang mga pangyayari. Mapapatawad daw niya ako pero hindi pa daw siguro ngayon.

Ayoko ding magtagal kay Rex dahil may mga ugali siya na hindi ko gusto. May pagka-dominante siya at palagi na lang niyang ipinapa-mukha sa akin na siya ang “boss” sa bahay.

Love Talk, hindi ko alam ang gagawin ko, pero gagawin ko ang lahat, bumalik lang sa akin si James.

Aminado ako sa mga pagkakamali ko, at willing akong ituwid ang mga ito. Pero paano kung hindi na talaga bumalik sa akin si James? Ano nga bang dapat kong gawin para bumalik siya? Mahal na mahal ko talaga siya.

Love Talk, sana ay mapayuhan n’yo ako. Makikinig ako sa lahat ng mga sasabihin n’yo sa akin.

Maraming salamat sa oras at sana ay magtagal pa ang programang ito.

Umaasa,

“IRMA”