Hindi makapag-move on

October 27, 2012

Dear Yes Love Talk,

Magandang gabi sa lahat ng mga naksubaybay sa Yes Fm lalong-lalo na sa programang ito.

Nagdadalawang isip akong ibahagi sa inyo ang problemang pag-ibig ko pero sa tingin ko ay kailangan ko talaga itong gawin kaya lakas loob akong sumulat sa inyo at nagbabakasakaling matutulungan n’yo ako.

Tawagin n’yo na lang ako sa pangalang “ARIANE”, 26 years old, at tatlong taon nang nagtatrabaho sa Boracay.

Mag-dadalawang taon na akong single, at walang idine-date, dahil hindi ko pa rin makalimutan ang dati kong nobyo.

Siguro dahil na din sa mga magagandang pinagsamahan namin, o siguro dahil natatakot na rin akong magkamali pa ulit.

Si “BENJ” ang huli kong naging boyfriend. Since college, nasa isang department kami at batchmates din, hanggang sa niligawan niya ako, at noong nag-graduate kami ay sinagot ko siya at naging kami na nga.

Siya ‘yung lalakeng masasabi kong madalas na pinagpapantasyahan at pinag-aagawan sa campus noon hindi lang dahil sa looks niya kundi dahil na rin sa character niya. Mabait siya, isang gentleman, talented din at matalino, bukod sa pagiging matangkad at guwapo.

Bilang boyfriend, wala na akong mahihiling pa, dahil para sa akin, perfect na siya. Very supportive siya, thoughtful, at palagi siyang may surprise para sa akin. May dadalawin niya ako kahit na busy siya, o may gifts na ipapahatid sa akin. Talagang malaki ang pasasaalamat ko na siya ang pinili ko at naging boyfriend ko siya.

Pagkatapos naming mag-OJT dito sa Boracay, pareho din kaming na-absorb ng mga company na pinag-OJT-han namin. Kaya dito na kami nagtrabaho sa Boracay. Dahil may relative ako that time na dito din sa Boracay nagtatrabaho, doon ako sa kanya tumira. Si Benj naman, kumuha ng boarding house.

Magkaiba man ang mga kumpanyang pinapasukan namin, palagi pa rin kaming gumagawa ng paraan para makapag-kita o magkaroon ng komunikasyon. Pero dahil nadadagdagan ang mga responsibilidad ko sa trabaho, unti-unti ding nababawasan ang oras ko sa kanya.

Hanggang sa nag-iba na ang ugali niya. Naramdaman ko na hindi na kami katulad ng dati. Palagi na lang kaming nag-aaway kahit sa mga maliliit lang na mga bagay.

Isang araw, nalaman ko na lang mula sa isang kaibigan na nakikipag-kita na pala siya sa ibang babae. Hanggang sa nakipag-live in na pala siya sa iba, na nagkataon na isa pa sa mga pinaka-malapit kong kaibigan. Hindi man lang niya sinabi sa akin na ayaw na pala niya.

Hindi naging maganda ang paghihiwalay namin. Hindi man lang kami nagkita o nakapag-usap bago siya umalis dito sa Boracay. Nagtagal ng tatlong taon ang relasyon namin.

Malaki ang panghihinayang ko sa relasyon namin. Inakala ko na dahil mahal naman niya ako, maiintindihan niya kung bakit hindi ko nagagawang maglaan ng oras sa kanya. Hindi ko naman masasabing malaki ang pagkukulang ko dahil gumagawa pa rin naman ako ng effort para maglaan ng kahit kongting time para sa kanya, pero iniwan niya pa rin ako sa ere.

Pero hindi ko pa rin siya makalimutan. Umaasa pa rin ako hanggang ngayon na babalikan niya ako and magiging kami na ulit. Hindi pa rin ako nagpapalit ng number ko dahil umaasa pa rin akong isang araw ay tatawag siya o magtetext siya sa akin.

Minsan naiiyak na lang ako sa kaiisip sa kung anong nangyari sa amin at sa kung ano na sana kami ngayon. Hindi ko pa rin nakikita ang sarili ko na may ibang ka-relasyon bukod kay Benj. Pangarap ko ring magkaroon ng sariling pamilya, pero hindi ko talaga makalimutan si Benj.

Nagyon, may mga nanliligaw sa akin. Hindi naman sila nahuhuli kay Benj, pero natatakot pa rin ako na baka ganoon lang din ang kahinatnan ng susunod kong relasyon.

Love Talk, anong dapat kong gawin? Paano ko makakalimutan si Benj? Paano ko magagawang tumaggap ng ibang lalake sa buhay ko? Paano ako magmo-move on?

Hanggang dito na lang muna ang sulat ko. Maraming salamat sa pagbasa ng aking sulat at sana ay mabigyan n’yo ako ng payo sa sitwasyon ko.

Lubos na gumagalang at umaasa,

“ARIANE”

Nag-mahal ng "immature"

October 21, 2012

Dearest Love Talk,

Maligayang gabi sa lahat.

Isa rin po ako sa nakikinig sa inyong programa.

Nakakatawa at nakakahiya man, sumulat ako sa inyo para humingi ng payo, pero ginawa ko ito para malinawan din ang isip ko sa tulong ng mga payo ninyo.

Love Talk, lalaki po ako, pero nagkakaproblema din sa buhay pag-ibig.

Tawagin nyo na lamang sa pangalang “ARTHUR”, di ko tunay na pangalan, biyudo, ngunit walang anak.

Namatay ang asawa ko 11 years ago, 3 years pa lang kaming kasal nang ma-aksidente siya.

43 years old na ako ngayon, pero matikas pa rin dahil sa opisina lang trabaho ako, walang bisyo at alaga sa exercise.

Hindi sa nagmamalaki pero kung titingnan, mukhang nasa mid 30s pa lang ako, kaya kahit papano ay may mga babaeng nagkakagusto pa rin sa’kin, ako lang ang umiiwas, dahil ayaw ko ng sakit sa ulo.

Sa loob ng maraming taon hindi ko naiisip mag-asawa ulit, dahil matagal ako bago naka-recover hangang sa napadpad ako dito sa Boracay.

May dalawang taon na rin ako dito, Love Talk, gaya ng inaasahan ko ,dito ko pala sa Boracay makikita ang babaeng muling magpapatibok ng aking puso.

Nabuhayan na po ako ng loob ng makilala ko si “GERLIE” hindi nya rin totoong pangalan.

Pero parang hindi yata ito ang tamang panahon para sa amin.

Sa Gerlie kasi ay 22 years old pa lang at mahigit 20 years ang agwat ng edad namin.

Naniniwala naman sana ako na “age doesn’t matter”.

Ramdam ko rin naman na mahal ako ni Gerlie, dahil na kita ko sa kanya na loyal siya at ilang beses kong na patunayan iyon,  na kahit may nanliligaw sa kaniya hindi na nito pinapatulan pa.

Ngunit ang problema ko Love Talk, napansin ko sa ugali niya na parang teenager pa rin siya umasta.

Although naiintindihan ko siya dahil bata pa nga naman siya, pero may mga oras na parang wala na rin sa lugar ang ugali niya at hindi ko rin siya mapigil sa mga nais niya.

Subalit pagdating naman sa pagsasama namin, nakita ko na marunong at maalaga naman siya sa akin.

Sa ngayon kasi nagli-live in kami at almost 9 months na rin, pero ang labas ko ay para alalay o tatay nalang niya.

Kapag nariyan ang barkada niya out of place na rin ako sa kaniya.

Love Talk, panay po kasi ang labas nila ng kanyang mga friends mga limang beses sa isang buwan at kalimitan ay lasing na siya kung umuwi.

Hinayaan ko na lang siya sa mga nais niyang gawin, pero hindi talaga maalis sa isip ko na mag-alala kapag lumalabas sila at kung sino-sino ang kasama nila.

Nakakahiya mang aminin, pero, nagseselos na rin ako minsan sa nga friends niya, lalo pa at madalas ay tinutukso siya ng mga ito sa ex niyang friend na rin nila ngayon.

Bago kasi kami ay naging boyfriend nito ang kaniyang kaibigan, pero may tiwala naman po ako sa kaniya at ramdam ko naman na tapos na nga talaga sila sa kanilang relasyon.

Sa mura niyang edad, niyaya ko na rin po siyang magpakasal at hindi naman siya tumanggi.

Ang problema, kapwa mga magulang namin ay ayaw sa relasyon namin.

Sa part kasi ng parents ko, ayaw nila kay Gerlie ang kaniyang pagiging “easy-go-lucky” at pagiging immature nito.

Ang mga magulang niya naman ayaw sa akin kasi malayo ang agwat ng edad namin.

Ito rin ang rason Love Talk kung bakit hindi namin masabi sa mga parents namin na nagsasama na kami ngayon ni Gerlie.

Tingin ko desidido naman ang fiancée ko na pakasalan ako kahit tutol ang mga magulang namin.

Naniniwala ako na mababago iyon lalo pa at balak na rin namin lumagay sa tahimik at bumuo ng pamilya.

Love Talk, sa tingin po kaya ninyo, sapat na ang siyam na buwan na pagsasama namin para makilala namin ang bawat isa?

Aaminin ko, nagdududa ako sa mga galaw niya ngayon na parang hindi na ako ang priority niya. Noong una ay hindi naman ganito kalala ang sitwasyon namin.

Nagtataka nga din ako kasi noong nanliligaw ako sa kanya ay hindi naman siya ganito, nag-umpisa lang ang lahat nang dumating dito ang mga kaklase niya noong nasa kolehiyo pa siya para magtrabaho, samahan pa ng mga co-employees niya.

Love Talk, ang pagmamahal ko ba sa kaniya ay magiging sapat na para hindi magbago ang isip niya sa pagpapakasal sa akin?

Ayaw ko din naman na masakal o makapag-higpit sa kanya at baka lalong lumala ang sitwasyon namin.

Minsan, may pagkakataon na gusto ko ring maki-join sa kanila pero parang hindi naman ako welcome sa kanila.

Physically, hindi naman ako ang tipo ng tao na para naïve na tao, at masasabi mong out of these world.

Nakikisabay din ako at marunong makisama, Love Talk, kaya ganoon na lang ang pagtataka ko kung bakit ayaw niya akong makasama kapag lumabas sila.

Pero kung ako naman ang lumabas kasama ang mga kaibigan at katrabaho ko ay big deal na iyon sa kaniya.

Lately, minsan ay wala na rin siyang paki-alam sa feelings ko, basta enjoy lang siya sa mga barkada niya hanggang sa text.

Paliwanag niya sa akin, kesyo daw sa sinusulit niya lang ang pagiging single niya dahil sa susunod na taon na ang kasal namin.

Minsan, tinatanong ko siya kung nagbago na ang isip niya, pero sinasagot niya akong desidido pa rin siyang pakasal sa akin.

Love Talk, hahayaan ko nal ang ba siya sa ganitong gawain niya? Minsan, lasing na siya kung umuwi at kapag natanggal na ang pagka-lasing ay parang wala lang nangyari.

Tulungan n’yo naman akong, kung anong klaseng approach ang gagawin ko para maunawaan niya rin ako, concern lang ako sa kaniya.

Tama din po ba na mag-selos ako sa mga friends niya?

Kung ganyan siya ng ganyan, tama po bang ituloy pa namin ang pagpapakasal?

Takot kasi ako na kapag nakasal na kami at nasanay na siya sa buhay na ganito, baka hahanap-hanapin niya iyon.

Maraming salamat sa pagbasa ng aking sulat, at sana ay mapayuhan ninyo ako.

Lubos na nagmamahal,

“ARTHUR”

October 13, 2012

Dear Yes Love Talk,

Matagal ko nang sinusubaybayan ang inyong programa bagkos nag-aalinlangan pa po akong ihayag ang aking saloobin patungkol sa aking kwentong pag-ibig.

Bago ko po simulan ang aking kwento, tawagin nyo na lang ako sa pangalang “MARK”, 23 anyos na taga Romblon. Pumunta po ako dito sa Boracay na sa nais na makahanap ng magandang trabaho. Sumang-ayon naman sa akin ang kapalaran at ako’y mabilis na nakahanap ng trabaho dito sa Boracay.

Dito ko rin nakilala ang unang babaeng siyang nagpatibok ng aking puso. Itago na lang natin siya sa pangalang “ABBY.”  Sa una nahirapan akong pakisamahan siya at palagi kaming nag-aaway. Halos di kami magkasundo sa mga bagay-bagay dito sa aming trabaho.

Sa likod naman ng hindi namin pagkakasundo at madalas na pag-aaway mas lalong nakilala ko siya nang husto. At nararamdaman kong napapalapit ang loob ko sa kanya bagamat pilit ko itong itinatanggi tuwing kami ay tinutukso ng aming mga kasamahan sa trabaho.

Nangangamba ako sa posibleng maisagot niya sa akin kung sakaling aminin ko ang tunay na pagtingin ko sa kanya na hindi lang bilang isang katrabaho. Hanggang dumating sa puntong nagkaroon ako ng lakas ng loob na maipagtapat sa kanya na siya’y napamahal na sakin.  Simula noon ay umiba na ang pangkaraniwang pakikitungo niya sa akin. Inakala ko na baka mas lalong magalit siya sa akin dahil sa mga sinasabi kong yoon.

Nalaman ko na lang sa kasamahan na kanyang kaibigan na lihim rin pala niya akong minahal. Di na ako nagpaligoy-ligoy pa at siya ay aking kinausap tungkol sa nararamdaman namin sa isa’t-isa. Sa madaling salita, siya ay niligawan ko.

Di nagtagal nagkaroon kami ng pormal na relasyon. Hanggang nauwi ang lahat sa pakikipag live-in. Nagkaroon kami ng magandang pagsasama at sa ilang buwan naming pagsasama ay nabuntis ko siya.
Makalipas ang apat na buwan nagkayayaan kami ng mga kaibigan ko na magdisco sa isang bar dito sa Boracay at doon may nakilala akong babaeng tawagin na lang natin sa pangalang “RHEA.” Nagkainuman kami hanggang sa malasing kami. Niyaya ako ni Rhea na doon na lang matulog sa boarding house niya.  Sumama naman ako sa kanya at dahil sa kalasingan ay may nangyari sa aming dalawa.

Kahit magkasama kami ni Abby ay nagagawa ko pa ring makipagkita kay Rhea. Dalawang buwan na and pagsasama namin ni Rhea kahit patago ko lang siyang pinupuntahan. Hanggang dumating sa punto na siya’y nabuntis ko.

Natakot akong malaman ni Abby na may ibang babae ako kaya nagpasya akong magpakalayo-layo muna sa kanya. Ang sinabi ko ay uuwi muna ako sa Romblon para magpahinga sa aking trabaho at makapag-isip sa aking gagawin –kung paano ko maipapaliwanag sa kanya ang lahat ng pakakamali ko.

Noong andon na ako sa probinsiya namin sa Romblon, dalawang lingo pa lang ay nagkaroon pa ulit ako ng isa pang kasalanan, Love Talk. Nagkita kami ng aking kababata na babae na tawagin na lang natin sa pangalang “HANNAH.”

Si Hannah pala ay matagal nang may gusto sa akin at matagal niya na pala akong hinihintay na bumalik sa Romblon. Sinabi ko sa kanya ang lahat na may mahal na akong iba at buntis na siya pero binalewala niya ang lahat. Love Talk, may nangyari sa amin ni Hannah. Dalawang buwan din kami ni Hannah nag live-in sa Romblon at siya’y nabuntis din. Gusto naman ako ng pamilya ni Hannah ngunit ang mahal ko ay si Abby.

Love Talk, hindi ko na alam kung paano ko sasabihin kay Abby ang lahat. Natatakot kasi ako na baka iiwan niya ako. Sana matulungan nyo po ako sa aking problema at mabigyan niyo ako ng magandang payo kung paano ko ipagtatapat kay Abby ang lahat.

Maraming salamat po. God bless.

Lubos na gumagalang,

MARK

October 06, 2012

Dear Yes Love Talk,

Magandang gabi po sa lahat p ng taga-pakinig ng programang ito at sa mga taong bumubuo ng programang ito.

Inyo lamang po akong tawagin sa pangalan Janna. Ako po ay kasalukuyang nagtatrabaho dito po sa Boracay. Ako po ay dalawampu't dalawang taong gulang at sa kasalukuyan ako po ay may kasintahan na tawagin na lamang natin sa pangalang “Liam”.

Si Liam po ay kasalukuyang nagtatrabaho sa malayong lugar at malabo pa po sa sabaw ng pusit ang pagkakataon na kami po ay magkita isang beses sa loob ng isang taon.

Mabait si Liam, responsable at masasabi ko na, siya ang tipo ng lalaki na, every woman should dream of to be with. Mabait rin po ang pamilya niya. Kahit malayo po siya ay talagang naglalaan po siya ng panahon sakin. Tinanggap niya ako ng buong-buo. Kahit ang katotohanan na hinde po siya ang lalaking makakauna sa pagkababae ko. Mahigit isang taon na rin po kami sa ngayon.

Love Talk, bago po si Liam ako po ay nagkaroon ng karelasyon na sya namang higit kong minahal. Tawagin na lamang po natin sya sa pangalang “Dave”. Sobrang minahal ko po si Dave higit pa sa buhay ko. From that moment Dave is my LIFE. Lahat po ay ginawa ko para sa relasyon namin ni Dave but we ended up in nothing.

Nagkahiwalay po kami ni Dave dahil po sa third party. Third party na kailangan niyang gawin para sa pamilya niya. At sobrang sakit po sa akin ang bagay na iyon. Halos ikamatay ko ang mga panahon na lumipas. Until Liam came in my life. He courted me for almost 5 months. And things ran smoothly. He became my bestfriend / boyfriend. He knows about Dave. He gives me the assurance of freedom when Dave came back in my life. Liam is such a kind person. That's why everybody loves him.

Love talk, to be straight and to be honest.. I'm still in love with Dave. And now Dave is trying to bring back our relationship.

Sa puso ko mas lamang po sa puwesto si Dave. Sa praktikalidad na usapan si Liam naman ang nangunguna. Hinde ko po alam sa ngayon kung ano po ang gagawin ko.

Sa tingin niyo po, Sino ang pipiliin ko? Si Liam na mahal ako, tanggap ako, at marinong iisa ang babae or Si Dave po na siyang taong minahal ko ng buong puso; na bumabalik para itama ang pagkakamali niya; na palagi kong namimiss sa tuwina..?

Sana po matulungan nyo ako.

Maraming salamat.


Best Regards,

JANNA