"Nanlalamig"

Dear YES Love Talk,

Isang magandang gabi sa lahat ng mga sumusubaybay ng programang YES Love Talk. Naniniwala akong marami na kayong natulunagn at nabigyan ng payo tungkol sa kanilang mga ipinapadalang kuwento sa inyo na nababasa ninyo tuwing Sabado. Kaya’t sa pagpapadala ko ng sulat kong ito aY inaasahan kong matutlungan n’yo ako sa aking problemang puso.

Tawagin n’yo na lang ako sa pangalang “STEPHANIE”. Tulad ng iba, nandito ako sa Boracay para magtrabaho. 25 years old na ako at single pa rin hanggang ngayon, kung single nga naman talaga akong maituturing dahil sa sitwasyon ko.

Ang totoo, may boyfriend ako ngayon. Mag-iisang taon na kami ni “DAVE” na dito ko din nakilala sa Boracay. Bago naging kami ay medyo matagal din siyang nanligaw sa akin. Umabot yata ng mahigit anim na buwan bago ko siya sinagot. Matiyaga siya kaya nakuha niya ang “matamis kong ‘OO’”.

Si Dave ang klase ng lalake na parang wala kang maipipintas sa kanya. Malinis sa katawan, mabait, napaka-understanding at responsable. Maraming nagsasabing suwerte na daw ako sa kanya.

Masaya ako kay Dave at nararamdaman kong masaya din naman siya sa akin, lalo na noong nag-uumpisa lang kami. Pero no’ng tumatagal na ang takbo ng relasyon namin, napapansin kong hindi na kami gano’n kasaya tulad ng dati, lalo na ako.

Parang hinaayaan ko na lang siya na gawin ang gusto niyang gawin. Parang “civil” na lang ako sa kanya, ‘yung tipong OK lang na wala siya, OK lang din na nand’yan siya. Hindi ko na siya masyadong hinahanap.

Kung sa ibang babae, kapag alam nilang may palaging kasamang ibang babae ang mga partner nila, magse-selos agad sila. Pero ako, alam kong palagi niyang kasama ang ka-trabaho niyang babae dahil naka-assign sila sa parehong project, pero parang hindi ako nagseselos. Parang masaya pa nga ako para sa kanya, at open ako sa ideya na magkatuluyan sila.

Wala naman akong ibang lalakeng napagbabalingan ng damdamin ko sa ngayon.

Love Talk, naguguluhan ako sa sarili ko. Nagtataka ako kung bakit nagiging “matabang” na ako kay Dave. Hindi kaya dahil sa palagi kaming magkasama o kaya ay dahil sa nagtagal na ang aming relasyon?

Hindi ba parang niloloko ko lang siya? Kasi parang requirement na lang sa akin na sagutin siya ng “I love you, too.” kapag nagsasabi siya sa akin ng “I love you.”

Alam kong faithful siya sa akin. Alam kong ako ang problema at hindi siya. Ayokong lokohin siya. Ano nga ba talaga ang dapat kong gawin?

Love Talk, sana ay mapayuhan ninyo ako. Kung ano man ang sasabihin ninyo ay tatanggapin ko at pag-iisipan ko.

Hanggang dito na lang ang sulat ko. Maraming salamat sa pagbibigay ng oras sa aking problema at sana ay tumagal pa ang inyong programa.

Umaasa,

“STEPHANIE”

Iniwan na walang kaalam-alam

Dear YES Love Talk,

Isa ako sa mga tagapakinig ng mga programa ng YES FM Boracay, lalo na ng YES Love Talk, at bawat pakikinig ko ay umiiyak ako dahil sariwa pa ang sugat na likha ng nangyari sa akin.

Love Talk, tawagin n’yo na lang akong si “MS. JEAN 14”. May ka-partner ako na kung baga dati ay barkada ko. May nabuong relasyon sa pagitan namin hanggang sa nabuntis ako. Akala ko Love Talk, siya na talaga ang ibinigay sa akin ng Panginoon para makasama ko sa habang panahon.

Dalawang buwan akong buntis nang umalis siya bilang OFW sa Quatar. Mula nang umalis siya ay hindi siya nagkulang ng padala sa akin at sa magiging baby namin dahil gusto na talaga niyang magka-anak kami.

Naging masaya siya nang malaman niyang baby boy ang magiging baby namin. Hanggang sa nanganak ako noong December, and’yan pa rin ‘yung sustento niya sa amin at palagi din siyang tumatawag.

Hanggang sa dumating ang buwan ng July. Iyon na ang buwan na huli siyang nagpadala sa amin. Ang sabi niya kasi uuwi siya. Inintindi ko siya Love Talk, dahil gusto ko rin naman na makita niya ang baby namin.

Pero nagulat na lang ako, Love Talk, nang umuwi siya noong August na hindi man lang tumatawag o nagpasabi. Nasa Maynila na pala siya.

Dumating ang buwan ng September. Nagulat na lang ako nang malaman kong nagpakasal na pala siya sa ibang babae. Hindi ko man lang nalaman na may kasalang nangyari kung hindi ko pa nakita sa Facebook ang picture nila ng babae na naka-wedding gown at siya na nakabihis din ng pang-groom.

Love Talk, feeling ko that time, parang gusto kong magpakamatay. Awang-awa ako sa sarili ko lalung-lalo na sa 8-month old na baby ko lalo na at kailangan ko siyang buhayin na ulila na din naman ako sa magulang.

Love Talk, ano bang dapat kong gawin para mabuhay ang baby ko? Gusto kong magtrabaho pero wala naman akong mapag-iiwanan ng baby ko. Sa ngayon ay nandito ako sa Boracay sa isang kaibigan ko.

Love Talk, kelangan ko ng advice n’yo. Ano bang dapat kong gawin? Gulung-gulo na ang isip ko.

Sana ay matugtog n’yo na rin po ang kantang “Ikaw Sana” ni Ogie Alcasid.

Hanggang dito na lang ang sulat ko at maraming salamat Love Talk.

Umaasa,

“MS. JEAN 14”

Nobya o pamilya?

Dear YES Love Talk,

Magandang gabi sa lahat ng mga nakikinig, lalo na sa sulat kong ito.

Tawagin n’yo na lang akong si “LEON”. Dito na ako namamalagi sa isla ng Boracay at apat na taon na akong nagtatrabaho ito.

May pinapaaral pa akong kapatid at ako lang ang inaasahan ng mga magulang ko. Mula nang magkaroon ng problema ang pamilya namin ay nagkaroon na kami ng kakulangan sa pera. Sobra kaming naghirap mula noon kaya ako napadpad dito sa Boracay. Dahil na din sa awa ko sa mga magulang at kapatid ko kaya tiniis kong hindi umuwi sa amin sa loob ng apat na taon.

Sa apat na taong inilagi ko dito sa isla ay may nakilala akong babaeng itago na lang natin sa pangalang “JANICE”. Nandito din siya sa isla para mag-trabaho bilang isang massage therapist. May guest kasi siya sa resort namin kaya kami nagkakilala. Kinuha ko ang number niya at mula noon ay naging textmates na kami kung saan lalo naming nakilala ang isa’t-isa.

Hindi nagtagal ay naging magkasintahan kami ni Janice. Naging honest ako sa kanya at alam niya ang buong pagkatao ko at ang kwento ng buhay ko at alam kong mahal din naman niya ako. Palagi niya akong niyayayang tumira na lang kami sa iisang bahay, kaya lang sapat lang ang kita ko sa pangpaaral sa kapatid ko kaya hindi ako pumayag sa gusto ni Janice. Ipinaliwanag ko naman sa kanya na hindi pa kami pwedeng magsama sa ngayon at darating din kami doon sa tamang panahon. Naging OK naman ‘yon sa kanya noong una.

Isang araw na pumunta siya sa boarding house ko, OK naman ‘yung pinag-uusapan namin pero napansin kong panay ang pagti-text niya at talagang hawak niya ang cellphone niya. Maya-maya, may tumawag sa kanya. Kinukuha ko sa kanya ang cellphone niya pero ayaw niyang ibigay na parang may itinatago siya sa akin. Sa pamimilit ko ay nakuha ko ang cellphone niya. Itinext ko ‘yung number na tumatawag sa kanya na tumawag ulit. Boses ng lalake ang narinig ko nang sinagot ko yung tawag at hinahanap niya si Janice. Sinabi ko sa kanya na nasa boarding house ko si Janice at ako ang boyfriend niya at huwag na siyang tumawag o magtext sa nobya ko.

Sa sobrang galit at selos ko ay naitulak ko si Janice at nasampal ng hindi naman kalakasan.naisip ko din kasing niloloko niya lang ako. Umiyak ng umiyak si Janice. Pagkatapos ay niyakap ko siya ng mahigpit at kinausap ko siya kung itutuloy pa rin ba namin an gaming relasyon. Sabi niya, oo daw, mahal daw niya ako. Tinanong ko siya kung sino yung lalakeng ‘yon. Sabi niya nanliligaw din daw sa kanya ‘yon.

Sobrang sakit para sa’kin na na marinig ‘yon kasi alam niyang may boyfriend na siya pero nagre-reply pa rin siya sa lalaking ‘yon at sinasagot ang mga tawag niya. Pero pinatawad ko pa rin siya at tinanggap ko pa rin siya dahil mahal ko siya.

Ngayon ay sinasabi na naman niya sa akin na magsama na lang kami sa iisang bubong para hindi na daw mangyari ulit ‘yon at para hindi na daw ako magduda sa kanya.

Love Talk, hindi ko alam kung anong dapat kong gawin. Naguguluhan ako kasi ‘pag nagsama kami ni Janice, kailangan din naman ako ng pamilya ko. Mahal ko ang mga kapatid ko at kailangan ko munang mapatapos ang pinag-aaral namin sa kolehiyo. Pero mahal ko din si Janice. Sino ba talagang dapat na unahin ko, ang pamilya ko o ang babaeng minamahal ko?

Love Talk, sana mabigyan n’yo ako ng payo dahil gulung-gulo na ang isip ko ngayon, minsan natutulala na ako sa kakaisip kung anong dapat kong gawin.

Lubos na gumagalang,

LEON