Malabong usapan

Dear Yes Love Talk,

Isang magandang gabi ang bati ko sa inyong lahat. Minabuti kong isulat ang problema ko dahil naguguluhan na ako sa sitwasyon ko ngayon at kailangan ko ng tulong.

Matagal-tagal na rin akong nakikinig ng YES Love Talk at iba’t-ibang kwento ng buhay na rin ang narinig ko. Kaya gusto ko ring subukan na marinig ang payo n’yo at ng mga nakikinig sa inyo.

Itago n’yo na lang ako sa pangalang “ANDREA”, 22 years old, at apat na taon nang nagtatrabaho dito sa Boracay.

Hindi naging maganda ang hiwalayan namin ng ex-boyfriend ko. Dito na din kami nagkakilala sa isla. Tumagal ng tatlong taon ang relasyon namin. Inakala kong siya na talaga ang makakasama ko sa buhay. Sa loob ng tatlong taong iyon, ilang beses niya rin akong niloko at ilang beses ko rin siyang pinatawad. Pero sa bandang huli, wala pa ring nangyaring maganda sa relasyon namin. Tatlong buwan pa lang ang nakakalipas nang maghiwalay kami.

Dahil sa lungkot, pinilit ko ang sarili ko na maghanap ng mga bagay na p’wede kong mapag-libangan. Sinubukan kong makipag-kilala sa ibang tao. Last month, nakilala ko si “JEFFREY”. 27 years old na siya, limang taon na ding nagtatrabaho dito sa isla.

Nagsimula sa barkada-barkada, kasama sa gimikan, ka-lokohan, pero hindi ko inakalang sa kanya pa ako mahuhulog. At hindi ko rin naman sana gustong sa kanya mahulog ang loob ko.

Sa mga kwento niya at ng mga kaibigan niya, matagal na daw siyang walang girlfriend. Pero may girl siyang hinihintay. Sabi ng mga kaibigan niya, ilang taon na daw niyang hinihintay ang ex-girlfriend niya na umuwi ng Cebu para makapag-aral. Nawalan na din daw sila ng communication pero naghihintay pa rin daw si Jeffrey sa kanya. Dahil do’n kaya hindi din ako umaasa na mapansin niya ako ng higit pa sa isang kaibigan lang.

Pero hindi ko din talaga napigilan na tumibok ang puso ko para sa kanya. Hindi ko maiwasang maipakita sa kanya ang pag-aalala, ang pagiging concerned at ang pagki-care sa kanya.

Hindi ko na din namalayan na iba na rin ang ikinikilos niya ‘pag magkasama kami. Palagi niya akong tinatanong kung anong mga gusto at ayaw ko, inaayang lumabas na kami lang dalawa ang magkasama, palaging nag-aaya ng dinner o lunch na kami lang dalawa. Hindi ko tuloy maiwasang mapatanong sa sarili ko: may ibig sabihin ba ang mga ikinikilos niya?

Hindi ko na nga rin maiwasang lalong mahulog sa kanya. Wala kaming pormal na relasyon, pero sa mga kilos namin, masasabi ng lahat na parang kami na.

2 weeks ago, sinabi niya sa akin na tinawagan daw siya ng ex niya at dito daw sa Boracay magnu-New Year. Gusto daw ng girl na sana magkasma sila. Tinanong ko siya kung anong desisyon niya. Sabi niya, hindi niya daw alam.

Hindi ko maiwasang malungkot nang malaman ko ito. Kapag magkasama kami, parang gusto kong sabihin sa kanya na “P’wede, ‘wag mo na lang siyang i-meet? ‘Andito naman ako.” Pero hindi ko magawa. Hindi naman “kami”. Ni hindi nga siya nanligaw ng pormal sa akin.

Love Talk, akala ko hindi mangyayari sa’kin ‘to, pero nangyayari na nga. Naguguluhan ako. Ayokong maging “assuming”, pero parang ganu’n ang nangyayari dahil sa mga ipinapakita niya sa akin. Ina-assume ko na may gusto din siya sa akin dahil palagi niyang ipinapakitang nagki-care siya sa akin. Palagi din siyang sweet sa akin. Ayoko na ding masaktan, lalo na at hindi maganda ang past relationship na pinanggalingan ko. At alam ko rin namang matagal niya na ding hinihintay ang pagbabalik ng ex niya.

Love Talk, bakit ba kasi gano’n siya sa akin? Bakit very caring siya sa akin? Talagang nahulog na ako sa kanya. At anong dapat kong gawin? Iiwas na lang ba ako sa kanya, o dapat ko bang ipaglaban ang nararamdaman ko? Ayoko na talagang masaktan pa.

Maraming salamat sa pag-basa ng sulat ko. Sana ay mapayuhan ninyo ako sa problema ko.

Paki-play na rin ng song na “Kung Ako Na Lang Sana” ni Bituin Escalante. Maraming salamat at Happy New Year po sa lahat.

Lubos na umaasa,

ANDREA

Ang nagmamahal, o ang minamahal?

Dear YES Love Talk,

Good evening sa inyong lahat, at sa mga taong nakikinig ngayon ng Yes Love Talk. Gusto ko lang sanang magbahagi ng aking problema at humingi ng advice sa inyo.

Tawagin n’yo na lang akong si “Tricia”, 24 years old at kasalukuyang naninirahan dito sa Boracay ng limang taon. Lagi akong nakikinig ng Yes Love Talk at naisipan ko pong humingi sa inyo ng advice sa aking problema.

May boyfriend ako na tawagin na lang nating si “Raymond”. Kasalukuyan siyang nagtatrabho dito sa isang resort sa Boracay. Nakaroon kami ng relasyon ng tatlong taon. Naging masaya ang relasyon naming dalawa. Naipakilala niya na ako sa mga parents niya, at wala akong naging problema dito dahil sobrang mababait ang mga mgulang niya, at dahil dito ay nag-sama kaming dalawa.

Naging masaya ang pagsasama namin, at dahil tapat kami sa isa't isa ay walang naging problema. Dumating ‘yung time na nagkaroon kami ng trabaho. Napagkasunduan naming na huwag munang magsama sahil mag-iipon muna kami. Tumira ako sa uncle at auntie ko at humiwalay din siya ng tirahan sa akin. Nagkikita rin naman kami minsan pero saglit lang, minsan nga ako pa pumupunta sa kanya para magkita lng kami. Hanggang sa nawalan na siya ng time sa akin dahil ibinuhos niya lahat ng oras niya sa trabaho. Kahit nga text, hindi na siya nakikipag-communicate sa akin.

Hindi naging madali para sa akin ‘yun. Noong una, OK lang, pero nu’ng tumagal, nasasaktan na ako. Kinausap ko siya, sinabi ko sa kanya na nawawalan na kami ng time sa isa't-isa. Sinabi niya sa akin para naman daw sa amin nang ginagawa niya. Inintindi ko na lang siya. Wala naman akong nababalitan na may ibang babae siya.

Noong tumatagal, nakipag-break din ako sa kanya dahil wala na nga kaming panahon para sa isa’t-isa. Sinabi ko sa kanya na bigyan namin ng space ang isa't-isa kasi pati pagtatrabho ko na aapektuhan na sa kakaisip sa kanya. Pero wala naman kaming personal break up, sa cellphone lang ako nakipag-hiwalay sa kanya. Simula noon, hindi na ako nakipag-communicate sa kanya. Nagpalit ako ng cellphone number kahit nahihirapan ako ay tiniis ko ‘yon.

Dumating po ‘yung time na binaling ko ang isip ko sa ibang tao. May nanligaw sa aking isang foreigner na tawagin na lang natin sa pangalang “Scott”. Isa siyang missionary dito sa Boracay. Mabait siya, matulungin at my takot sa Diyos. Parang nahulog ang loob ko sa kanya kahit na 14 years ang gap ng edad namin. Hindi nagtagal ay sinagot ko siya, at naging masaya kami. Walang araw na hindi kami magkasama. Pinatigil niya ako sa trabaho at kumuha siya ng isang apartment. Lahat ng panganagilangan ko ay ibinibgay niya sa akin. Minsan, nagi-guilty ako kasi alam kong mahal ko pa rin si Raymund , pero pinipilit kong kalimutan siya.

Dumating ang panahon na nagkita kami nang hindi sinasadya. Nag-usap kami, at sabi niya akin matagal niya na daw akong hinahanap. Wala daw may nakapagsabi sa kanya kung nasaan ako. Umiiyak siyang nagmakaawa siya sa akin, gusto niyang makipag-balikan sa akin. Napa-iyak din ako kasi alam ko na mahal ko din siya pero pinigilan ko pa rin ang sarili ko. Sinabi ko sa kanya lahat: na my boyfriend na ako, at magpapakasal na kami. Sabi niya sa akin gagawa daw siya ng paraan para mabawi ako at magsusumikap daw siya dahil alam niya daw na mahal ko pa din siya at my tiwala pa rin siya sa akin.

Simula noon, hindi na po ako nakakatulog. Lagi ko siya iniisip. Hindi ko alam ang gagawin ko ngayon. Mahal ko pa rin si Raymund. Love Talk, anong gagawin ko? Pipiliin ko ba ‘yung mahal ko o pipiliin ko ‘yung taong minamahal ako, na alam kong masasaktan ko siya kasi alam kong mahal na mahal niya din ako. Sana matulungan niyo ako. Maraming salamat.


Nagmamahal,

TRICIA

Isang komplikadong sitwasyon

Dear Love Talk,

Una po sa lahat magandang gabi po sa lahat at salamat sa pagbasa ng sulat ko. Itago nyo na lang ako sa pangalang "CEL". Taga-Antique ako, 20 years old at kasalukuyang nagtatrabaho bilang isang taga-luto sa isang Korean resto dito sa Boracay.

Naglakas loob po akong sumulat sa inyo upang mabigyan po sana kahit papaano ng solusyon ang aking nagawang kasalanan na hanggang ngayon ay hindi ko maitama.

Love Talk, 16 years old pa lang po ako ng sinubok na ako ng napakahirap na pagsubok. Sa edad ko pong 16 ay nagka-nobyo ako at itago nalang po natin sa pangalang "NALD", 22 yrs old, tubong Ibajay, at isang trabahador sa isang pamilihan dito sa Boracay.

Kahit hindi ko siya gaanong kilala ay minahal ko siya ng sobra at ramdam ko din na minahal niya ako. Naging masaya kami sa aming relasyon na tumagal ng dalawang taon, at ni minsan ay hindi kami nag-away sa mga panahong iyon. Alam ko na napakabata ko pa pero para sa amin ay perfect na ang lahat ‘pag magkasama kami, at pinangarap ko na at ipinagdasal na sana ay sya na nga ang mapapangasawa ko. Pero hindi pala, nagsisimula pa lang pala ang matinding pagsubok sa buhay ko.

Isang araw ay nag-usap kami. May importanteng surpresa sana ako sa kanya.l Ang sabi niya, may mas importante daw siyang sasabihin sa akin. Kita ko sa mga mata niya ang lungkot, kaya pina-una ko si9ya sa sasabihin niya.

Love Talk, inamin niya sa akin na may asawa siya at dalawang anak, at kasal na sila ng asawa niya na nasa abroad ng mga panahon na iyon.

Hindi ko masabi kung gaano kasakit ang nadama ko sa mga oras na iyon. Hindi ko namalayan na nakatulala na pala ako at tumutulo ang luha. Wala po akong masabi kundi tanungin siya kung anong plano niya. Ang sabi niya ay mahal din po niya ako pero mas matimbang ang pamilya niya.

Love Talk, hindi ako nakatulog ng gabing iyon, hindi ko maintindihan ang nararamdaman ko: magkahalong galit, sakit, at konsensya. Hindi ko pinangarap na maging kabit pero nangyari sa’kin ito. Hindi ko na din nagawang sabihin sa kanya ang surprise ko sa kanya. Hindi ko nasabi sa kanya na buntis ako.

Kinabukasan ay agad akong umuwi sa Antique upang umiwas na lang dahil alam ko na mali po ang nagawa namin. Pagdating ko sa amin ay niyaya ko ang kababata ko na  lalaki na itago na lang natin sa pangalang "CHAM". Nagkayayaan kaming mag-inuman dahil gusto kong makalimot.

Love Talk, sa pangalawang pagkakataon ay nakagawa ako ng pagkakamali noong gabing iyon. May nangyari sa amin ni Cham at naulit pa ito ng ilang beses. HIndi ko alam ang gagawin ko dahil ako ang panganay sa aming magkakapatid at ako ang inaasahan ng pamilya.

Nang mag-isang buwan na ang ipinagbubuntis ko ay sinabi ko sa nanay ko na buntis ako at si Cham ang tinuro kong ama ng dinadala ko. Hindi ko din maintindihan kung bakit ko nagawa iyon. Ang masama pa ay hindi ako pinanagutan ni Cham dahil ikakasal na rin siya sa nobya niya. Ang sabi niya ay susuportahan na lang daw niya ang bata, at hindi ko ito tinanggap. Nagkagulo ang pamilya namin at muntik ng umabot sa demandahan.

Si Nald naman ay walang kaalam-alam sa nagawa ko. Isang araw may nakapagsabi kay Nald na buntis ako. Tinawagan niya ako. Sinabi niya na alam daw niya na siya ang ama ng dinadala ko. Inamin ko din naman sa kanya na siya nga ang ama ng ipinagbubuntis ko. Susuportahan daw niya ang dinadala ko. Tinanggihan ko rin siya. Hindi niya pa rin alam na pinaako ko ito sa iba.

Love Talk, one year old na ang baby girl ko at hanggang ngayon ay hindi ko maayos ang pagkakamaling nagawa ko. Ako lang ang nakakaalam nito at di rin alam ng pamilya ko. Hanggang ngayon ay nagkakagulo pa rin ang pamilya ko at pamilya ni Cham dahil tinanggap na ng mga magulang ni Cham at ang akala nila ay apo nga nila ang anak ko.

Love Talk hindi ko alam kung paano at saan ako magsisimula upang maayos ko ang maling nagawa ko. Maayos na sana ang lovelife ko ngayon at ikakasal na din ako. Ano po ang gagawin ko, itatago ko na lang ba ito habang buhay? Naguguluhan ako at pinagsisihan ko ang nagawa ko. Sana ay mabigyan n’yo ako ng payo. Maraming salamat po.

Lubos na gumagalang,

"CEL"

"Torn between two lovers"

Dear Love Talk,

Isang magandang gabi sa lahat, sa lahat ng taga pakinig ng programang ito at sa inyong bumabasa sa sulat ko.

Ako ay may problema sa puso Love Talk, pero parang mas higit na problema ko ngayon ang aking buhay na di ko alam kong saan ang dereksiyon.

Tawagin na lamang ninyo ako sa palayaw kong, “Rina “, 19 years palang po ako, naririto sa Boracay at naguguluan.

Tumakas kasi ako sa amin dahil sa hindi naging magandang karanasan sa probinsiyang pinagmulan ko.

Sumama ako sa pinsan ng best friend ko dito sa Boracay para magtago at kilalanin ang aking sarili.

Love Talk, 4 months na akong buntis ngayon, kaya naguguluhan ako kung ano ang pwede kong gawin.

Kinakasama ko ngayon si Erwin, ang pinsan ng best friend na dito na nagtatrabaho.

Noon paman ay kakilala ko na siya at matagal na siyang nanliligaw sa akin simula noong high school pa.

Naging masugid ko siyang textmate at naging mabait naman siya sa akin, kababayan ko po siya.

September, ng tumigil ako sa akin pag-aaral sa college para sumama dito.

Nabuntis kasi ako ng taong mahal ko na hanggang sa ngayon ay hindi pa alam ng mga magulang ko.

Si Jay ang ama ang dinadala ko love talk, at nang malaman ko na buntis ako, hindi ko na hinintay pa na malaman ng mga kamag-anak ko ang aking sitwasyon.

Hindi ko rin gustong makita nila na lumaki ang tiyan ko, lalo pa at tinatago ko ang kalagayan ko kay Jay, sa ama ng anak ko.

Hindi kasi alam ng mga magulang ko ang relasyon namin ni Jay, si Jay ay may asawa at anak na po. Nagkilala kami sa School na siyang pinapasukan ko bilang Working Student at faculty din siya doon, 35 years old na  siya ngayon.

Hindi ako na hirapan na mahalin siya kasi kung pumorma siya ay nasa late 20’s lang po at mabait siya.

Kaya iyon din ang rason kung bakit ko hiniwalayan ang dati kong boyfriend na ka-edad ko rin, kasi nakita ko lahat ng kataingaang hinahanap ko sa isang lalaki kay Jay.

Matured na siyang magisip, responsible, pero sa panliligaw ay daig niya pa ang teenager.  

Masakit at nakakahiya mang, pero naging mistress niya ako at mahigit 1 year na rin ang relasyon namin.

Nang-umalis ako sa amin, sinabi ko naman po sa pamilya ko na dito ako pupunta at maghahanap ng trabaho, dahil nahihirapan na akong pagsabayin ang trabaho doon at pag-aaral.

Aside doon, wala na silang ibang alam sa sitwasyon ko dito.

Si Erwin at ako ay hindi na walan ng komunikasyon kaya ng nalaman kong na buntis ako siya at ang best friend ko lang ang pinagsabihan ko.

Kaya alam nila lahat ng pinagdadaanan ko sa buhay.

Nagulat din ako at hindi ko akalain na sa kabila ng sitwasyon kung ito, may lalaking nakakaintindi at handang dumamay sa akin Love Talk.

Akala ko kasi noong una binibiro niya lang ako ng sabihin niyang handa siyang panagutan ako kahit hindi siya ang nakabuntis sa akin.

Nakita ko naman ang sakripisyo ni Erwin sa akin kahit mahigit 2 months palang ako dito sa kaniya,”sino ba naman kasing lalaki ang tatanggap ng bata na hindi sa kaniya”.

Siya na ang nagbibigay ng mga panga-ngailangan ko ngayon, siya na rin ang nagpapakain sa akin at saka nalang daw ako magtrabaho kung makapanganak na.

Si Erwin po ay 32 years old na ngayon love talk, mayroon po siyang kinakasama doon sa amin probinsiya at hindi sila kasal, pero may isang anak.

Inuwian daw kasi siya ng babae na hindi niya naman mahal,  pero inaamin niya namang siya talaga ang ama ng bata.

Hindi niya sinama ang babae at anak nila dito sa Boracay kasi hindi niya naman daw makakasundo at ayaw niyang makasama ito.

Nangako po siya lovetalk na kapag naayos na niya ang lahat at mapa-unawa sa kaniya magulang at ina ng kaniyang anak ang lahat, lalo na ang kawalan niya ng plano na pakasalan ito, dahil ako daw ang pakakasalan niya.

Natuwa naman ako sa mga plano niya para sa amin, pero hindi ko kasi hawak ang oras at pagkakataon Love Talk.

Kaya may mga oras na natatakot ako, lalo na kung dumating ang panahaon na magbago ang isip niya at magising siya sa katotohanan.

Kahit ganito kasalimuot ang napasok kong sitwasyon nakokonsensiya naman po ako.

Alam din kasi ni Erwin kung gaano ko kamahal talaga si Jay, kaya naiisip ko rin minsan na baka isumbat niya sa akin na sumalo lang siya, at hindi ko naman talaga siya minahal.

Bago po ako nabuntis ni Jay, ay nakapag-file na rin ang annulment sa asawa niya.

Gusto na raw niya kasing hiwalayan ito para magsama na kami, dahil noon paman ay hindi nito mahal ang kaniya asawa at ang nangyari ay pinilit lamang sila ng kapwa magulang nila.

Pero hindi ako naniniwala na iyon lang ang rason niya Love talk, alam ko na dumaranas sila ng problemang mag-asawa kahit hindi paman kami. 

Hindi po ganon kadali ang pinagdaanan naming hirap para itago ang bawal naming pag-ibig, pero tiniis namin ang lahat hanggang sa nabuntis ako.

Pero nakikita ko kasing wala pa akong assurance at malabo pa ang lahat sa amin, di ko rin kasi alam kung mananalo siya sa annulment nila.

Kaya lumayo nalang muna ako sapagkat  ayaw kong madamay ang bata sa gulo na gawa namin.

Kaya ngayong naguguluhan po ako kung ano ang dapat kung gawin.

Ang totoo mahal ko po talaga si Jay, pero parang unti-unti na ring nahuhulog ang loob ko ngayon kay Erwin na siya bumubuhay sa akin ngayon.

Naguguluhan na rin po ang damdamin ko ngayon kung sino na sa kanilang dalawa.

Si Jay na naghahanap ng paraan para maging maayos ang pagsasama namin na isinakripisyo ang sariling pamilya para sa akin, o si Erwin na tumatayong sandalan ko ngayon na handang panagutan ko.

Hanggang sa ngayon ay hindi pa ako nagpaparamdam kay Jay dahil nagpalit na rin ako ng number love talk.

Infairness naman kay Jay, wala siyang alam sa sitwasyon ko ngayon, lahat din ng kumunikasyon na pwedeng mag-connect sa amin ay pinutol ko na.

Minsan daw nagtanong siya sa Best Friend ko, pero, sinabihan ko agad na wag ipa-alam kong saan ako, basta sabihing hindi niya alam at wala nang balita at bigla lang akong nawala.

Love talk, ngayong nakakita na po ang ng sandalan at handang panagutan ako, dapat ko pa bang ipa-alam pa ang kalagayan ko kay Jay?

Papano ko kaya ito sasabihin sa mga magulang ko?

Sa ngayon po kasi, ayaw ko pa sanang pa-asahin si Erwin, kasi mas matimbang pa rin si Jay.

Pero hindi pa rin ako handa na harapin ang asawa niya ngayon kasi habang tumatagal ay lumiliit na ang mundo sa amin.

Ginawa ko rin ito, para mabigyan ng pagkakataong mag-isip si Jay, Love Talk.

Pero ang hindi ko inaasahan may lalaking magmamahal pa pala sa akin sa kabila ng kalagayan ko.

Ano po ang gagawin ko?

Sana ay matulungan din ninyo ang problemadong puso at isip ko, sa paraan ng inyong mga payo.

Paki play naman po ang kantang, “Bukas nalang kita Mamahalin”

Umaasa,

Rina

Hindi ko hinangad maging 3rd party

Dear Love talk,

Good day! Itago nyo nalang po ako sa pangalang “BRIANNA”, 27 years old. Isa po akong OFW dito sa Hong Kong.

 Lakas loob po akong sumulat sa inyo para maibahagi ang aking kwentong pag-ibig.

High school lang po ang natapos ko dahil sa hirap ng buhay hindi ko na naipagpatuloy ang aking pag aaral. Umalis po ako sa edad na 21 na tanging baon ay kunting lakas ng loob.

Tiniis ko lahat ng pagod, hirap,at homesick para sa mga pangarap ko at maiahon sa hirap ang pamilya ko. Sa awa ng Diyos okay naman po kahit paano nakatagal ako sa iisang amo sa loob ng anim na taon. Akala ko po ayos na ang lahat kuntento na ako sa buhay ko,pero hindi ko akalain na guguho ang mundo ko.

Taong 2011 Oct last year umuwi po ako para mag bakasyon, nag kita po kami ng kaibigan ko na malayo ko na rin pong kamag anak.(2nd cousin po ang lolo namin). Nag stay po ako diyan sa Boracay ng mga ilang araw kasama ko po siya kasi diyan siya nagtatrabaho dati.

Sa maikling panahon ng pagkakaibigan namin komportable na kami sa isat-isa na parang matagal nang magkakilala.

Unang gabe ko na kasama ko siya diyan sa Boracay nag open siya sakin tungkol sa nakaraan nya. Single dad siya at may dalawang anak,pero nong time na yon may girl friend siya pero nag kakalabuan daw sila etc. Pero sa hindi maipaliwanag na sitwasyon may namagitan po samin.

Hindi po ako nag demand ng kahit na ano kahit tinanong niya ako kasi alam ko kasalanan ko kung bakit ako bumigay. Nangako po siya na aayusin. Deep inside po umasa ako kahit hindi ako umiimik. Nasundan po ulit ang pag kikita namin at naging kami bago ako bumalik ng Hong Kong. Text, tawag at chat ang tanging kumonikasyon.

Siguro napag isip-isip niya na malaking kamalian and relasyon namin kaya nakipaghiwalay siya sakin kasi hindi niya nagawang makipaghiwalay sa girl friend niya. Masakit man, tinanggap ko pa rin.

Nawalan na kami ng contact simula noon pero after siguro ng mga ilang buwan nakipag communicate siya ulit sakin. Nag resign siya sa trabaho at lumuwas ng Manila kasi gusto niya rin mangibang bansa.

Nakipagbalikan siya sakin kasi iba daw akong magmahal. Kahit malayo ramdam niya kung paano ko siya minahal, pinahalagahan,at hindi hinusgahan.

Tinaggap ko ulit siya. Sa mga araw na lumipas lalo siyang napamahal sakin. Ako kasi yung taong hindi tumitingin sa nakaraan na. Ang mahalaga ang ngayon at mga susunod pa.

Okay na lahat, masaya kami, umaasa ako na magkakasama kaming muli. Suportado ko siya sa mga desisyon niya at laging nasa likod pag kailangan niya; karamay sa mga problema at pag subok.

Pero nag tataka ako bakit patago ang relasyon namin. Madalas sa minsan inuungkat ko, ayaw ko man isipin pero nag dududa ako na may hindi ako alam at may itinatago siya.

Nagkaroon siya ng malaking problema sa papers niya kaya isinantabi ko muna ang pagdududa at hindi na ako nakisabay pa sa mga problema niya. Huli ko nang nalaman na nabuntis niya pala ang girlfriend niya at hindi naman sila naghiwalay.

Mula noon ay lagi na kaming away-bati at hinahamon ko siya nang hiwalayan pero di niya pinapatulan. Hanggang sa malapit na siyang umalis papunta sa ibang bansa nagdesisyon ako na papuntahin siya dito para makapag usap kami ng harapan at magkalinawan.

Nag-ipon ako ng lakas ng loob at sinubukan kong kausapin siya pero walang nangyari tahimik lang siya at nakikita ko ang lungkot sa kanyang mga mata na pilit niyang tinatago.

Ang plano ko ay makipagkalas na ako sa kanya pero hindi ko nagawa. Hindi ko kaya kasi mahal na mahal ko siya. Ganun pala yon, ang pakiramdam na pag kasama mo ang taong mahal mo parang wala nang bukas. Wala na kayong paki alam sa nangyayari sa paligid ninyo.

Umuwe siya ng Pilipinas na parang panaginip lang lahat, kahit ako di ko rin mapaniwalaang nagkasama ulit kami kahit sa maikli lang na panahon.

One month na rin siyang nakaalis ngayon at isa pang nakakayanig na kumpirmasyon ang natanggap ko ay nagpakasal na pala sila sa huwes nong time na nabuntis niya ang girl friend niya.

Tanging sorry lang ang nagawa at nasabi niya...sobrang sakit....wala akong magawa kasi legal na silang mag asawa. Ang hindi ko po maintindihan kung bakit pa siya nakipag balikan at bakit kailangan niya pa akong gamitin at paniwalain. Lahat pala yun ay puro kabaliktaran lang.

Minahal ko siya higit pa sa sarili ko. Giinawa ko lahat para maging mabuting girlfriend din ako sa kanya. Pero sakit lang lahat ang naging kapalit.

Ayaw ko pong pagsisihan lahat ng mga nangyari samin kasi ginusto ko lahat yon. Yun lang ang tanging natira sa akin "mga alaala ng mga masasayang sandali na kasama ko siya".

Nakukonsensya po ako sa mga maling nagawa at desisyon ko. Ni minsan po, hindi ko pinangarap na maging pangalawa, at wala akong intensyong manira ng pamilya. Hindi po mawala sa isip ko na masamang babae ako.

Sa kabila po ng lahat ng mga ginawa niya hindi ko magawang magalit ng lubos sa kanya. Aminin ko man sa hindi naramdaman ko rin na minahal niya ako.

Sana kung saan man siya ngayon magiging masaya na siya dahil alam ko sa puso ko na mabuting tao siya.

Maraming salamat po sa pagkakataong ito. More powers and God bless!

Lubos na gumagalang,

BRIANNA