Bawal na pag-ibig

Dear YES Love Talk,

Magandang gabi Ate Gina at DJ Fiona. Thank you sa pag-basa nitong sulat ko. Ako si “ROSE”. May 3 years old na anak ako pero hindi kami OK ng tatay niya. Minahal ko siya, ibinigay ko ang lahat, pero mukhang hindi pa rin ito naging sapat.

Unti-unti, nakalimutan ko siya, dahil may isang “DEREK” akong nakilala. Matiyaga siya, at pinahahalagahan ako, at sobrang na-appreciate ko ‘yon. Mahal niya ako at mahal ko rin siya. Kaya lang, sa pangalawang pagkakataon na nagmahal ako, doon pa ako napunta sa sitwasyong komplikado. May asawa siya, kasal at may dalawang anak. Sabi niya, hindi daw niya kayang mawala ako sa buhay niya at nawala na daw ang pagmamahal niya sa asawa niya. Nagkataon na kaibigan ko pa ang asawa niya at malapit sa akin ang pamilya at anak niya. Sa tuwing nakikita ko ang kabutihan nila, parang hindi ko kayang manira ng pamilya.

Naguguluhan ako dahil nagmamahalan kami kahit alam namin na mali ang ginagawa namin at marami kaming masasaktan at maaapakan, lalo na kapag nalaman ng asawa niya na ako ang dahilan ng magiging pagkasira ng pamilya niya… ako pa na inaakala niyang isang kaibigan.

Hindi ko na alam ang gagawin ko, naguguluhan ako. Nagmamahalan kami kahit na alam naming mali. Mahal ko siya, mahal niya ako, pero kasal siya at pagmamay-ari siya ng iba. Dapat ko ba siyang ipag-laban kahit na alam kong mali? O palalayain ko na lang ba siya kahit na alam kong siya na lang sana ang kulang sa buhay ko?

Sana ay mabigyan ninyo ako ng karagdagang payo para mabawasan naman ang sakit na nararamdaman ko at ang mga iniisip ko. Pagkatapos nito, kapag narinig ko na ang mga opinyon ninyo ay magmo-move on na ako. Sana lang makayanan ko ito.

Maraming salamat, Love Talk, Gina Marina at DJ Fiona. Please play the songs “Kung Malaya Lang Ako” ni at “Gusto Kita” for me DJs.

Nagmamahal,

“ROSE”

Torn between two choices

Dear YES Love Talk,

Magandang gabi po sa inyo at sa lahat ng nakikinig ng YES Love Talk. Tawagin niyo nlang ako sa pangalang "SHA-SHA". Ako ay taga-Caticlan. 18 yrs old na ako ngayong araw, May 18. Nag-aaral ako sa isang pribadong paaralan sa kalibo. Sa ngayon po my boyfriend ako, pinsan ng bestfriend kong lalaki.

Ako po yong tipo ng babaeng bihira lang makipagkaibigan sa mga babae kasi mas nakakasundo ko pa yong mga lalaki. Alam ni mama lahat ng ito at tanggap ‘yun ng buong family namin. Ok naman lahat sa amin.

Naging problema ko lang ‘yung bestfriend ko na tawagin n’yo na lang sa pangalang “PAUL”. 5 years na kaming mag-bestfriend. 1st year high school kami n’ung magkakilala kami ni Paul. 1st year pa lang kami, usap-usapan na sa school namin na may gusto s’ya sa’kin pero di ko na lang pinapansin ‘yun dahil pinapakita ko na mas mahalaga sa ‘kin yung friendship namin kaysa sa mga ganong bagay.

Hanggang sa umabot ng isang taon kaming magkaibigan, nagkaroon kami ng usapan na walang ligawan at iwanan na mangyayari sa ‘min. Nangako naman s’yang hindi n’ya ako mamahalin na higit pa sa kaibigan at hindi n’ya ako iiwan kahit anong mangyari.

Naging matibay pagkakaibigan namin, marami na kaming pinagsaluhan na lungkot, tagumpay at saya kasama ang mga barkada kong lalaki. Pero habang tumatagal, feeling ko, mas lalong nagkakagusto s’ya sa akin. Gumawa ako ng mga bagay na di n’ya gusto para ma-turn off sya sa’kin tulad ng sumubok akong mag-smoke, magpaka-boyish, and lastly, nakipag-boyfriend ako, pero talagang gumawa s’ya ng paraan para iwasan ko ang mga bagay na ‘yon. Naging OK ulit kami hanggang sa makapagtapos kami ng 4th year.

Nag-aral ako ng college pero s’ya hindi na. Nag-stop sya dahil sa financial problem. Within 1 year ko sa college, nawalan kami ng communication pero nakikibalita pa rin ako sa kanya ng di nya alam.

Sa ngayon meron na ulit kami ng communication ni Paul pero patuloy pa rin s’yang pagpaparamdam na mahal n’ya ako. Nahihirapan na ako sa pagpapakita sa kanya na di ako apektado at wala akong alam sa kanyang nararamdaman sa akin. I can’t deny na napamahal na rin sya sa akin pero may pangako kaming pinanghahawakan na di dapat masira, and most of all, may boyfriend ako, ayoko din kasi na maging unfair ako sa kanya.

At same time ayoko din na nasasaktan bestfriend ko. Lagi n’ya kasing sinasabi na sana hindi na lang s’ya nangako at sana daw sinabi n’ya na lang ‘yung totoong nararamdaman niya noon pa, pero pilit ko pa rin ‘yon tinatakasan at idinadaan ko lang lahat sa biro at kalokohan.

Mga ate, ano ba gagawin ko para di ko masaktan bestfriend ko at boyfriend ko? Sobrang nahihirapan ako tuwing nagkikita kaming tatlo sa isang sitwasyon. Mahal na mahal ko boyfriend ko pero ayokong masaktan at mawala bestfriend ko.

Sana matulungan n’yo ako. Thank you po sa pag-share ng teenage story ng buhay ko. Sana ay mai-play n’yo na sin ang songs na “Pusong Lito” at “Paano na Kaya”. Thank you and more power po sa program nyo.

Love,

SHA-SHA

Maling pagkakataon

Dear YES Love Talk,

Naniniwala akong sa pagmamahal, dapat sundin ang puso. Pero paano mo sundin ang puso mo kung marami naman ang masasaktan mo?

Magandang gabi sa lahat ng nakikinig sa programang YES Love Talk. Tulad ng mga sumusulat sa inyo, gusto ko rin sanang humingi ng payo mula sa inyo.

Itago n’yo na lang ako sa pangalang “AMY”. 25 years old, single, at dito na nakakuha ng trabaho sa Boracay mula nang umalis ako sa amin dalawang taon na ang nakakaraan. Umalis ako dahil sa kagustuhang hindi na makasakit ng mga taong minamahal ko, pero pilit pa rin akong sinusundan nito.

Si “JOY” ang maituturing kong best friend ko mula noong mga bata pa kami hanggang sa lumaki kami. Magkasama kami sa halos lahat: sa school, sa laro, sa lahat-lahat na. Para kaming magkapatid. Since nag-iisa lang siyang anak, at ako naman ang bunso at dalawa lang naman kami ng kuya ko, para na talaga kaming “sisters”.

Noong nag-college na kami ni Joy, nagkakilala sila ni “LESTER”. Niligawan siya ni Lester at hindi nagtagal ay sinagot naman siya ni Joy. Kapag nag-aaway silang dalawa, ako ang pinagsusumbungan nila pareho. Ako din ang tagapagpa-bati nilang dalawa. At kapag si Lester ang sumusuyo kay Joy, ako ang tulay.

Pagka-graduate sa college, pumunta si Joy sa Manila para sa licensure exams. Si Lester, naiwan sa college dahil medyo may pagka-bulakbol. Kami ni Lester ang madalas na nagkakasama dahil parang barkada na din kami.

Noong mga panahon ding ‘yon, nag-break kami ng boyfriend ko. Si Lester ang naging hingahan ko ng mga nararamdaman ko, lalo na ng mga heartaches ko. Hindi ko namalayan na unti-unti na akong nahuhulog sa kanya. At parang gano’n din siya sa akin.

Hindi din kami nakaiwas sa tukso. Dumating ang time na may nangyari sa amin na hindi dapat mangyari. Hindi naman ito nagbunga, pero hindi din namin ito sinabi kay Joy. Pinilit naming hindi na maulit ito, pero hindi din namin ‘yon natupad.

After a month mula ng may nangyari sa amin ni Lester, bumalik na si Joy sa lugar namin. Para hindi na ako makasakit, umalis ako sa amin, kahit na alam kong masasaktan ako. Pumunta ako sa iba’t-ibang lugar, nagpalit ako ng number, nakipag-relasyon sa iba at nakipag-kalas din, inaliw ko ang sarili ko para lang makalimutan ang lahat, hanggang napadpad ako dito sa Boracay.

Akala ko, OK na ako after 2 years, pero hindi pa pala.

2 weeks ago, hindi sinasadyang nagkita kami ni Lester dito sa isla. Nagka-kamustahan, nagkuwentuhan. Engaged na sila ni Joy, tulad din ng sinabi sa’kin ng best friend ko. Si Joy ay nasa Manila at nag-aasikaso ng business nila, si Lester naman ay nandito sa Boracay para din sa business nila. Si Joy daw ay hahabol na lang by the next week dahil may mga inaasikaso pa siya sa office nila. Marami kaming napag-kuwentuhan sabay tagay.

Pag-uwi, nalasing kami, and I ended up sa place niya. Something happened again sa aming dalawa. Kinaumagahan, nagmamadali akong umalis from his place, pero pinigilan niya ako. Sabi niya, matagal daw niya akong hinanap and ngayon daw na nakita na niya ulit ako, hindi na daw niya ako pakakawalan. He is willing to give up his engagement for me.

Umuwi akong naguguluhan. Since then, hindi na ako nagpakita kay Lester o kay Joy kahit na nagtampo pa siya sa akin. Si Lester nandito pa rin sa isla, nakikita ko siya pero iniiwasan ko siya dahil ayokong ako ang maging rason kung bakit sila maghihiwalay ni Joy. Pero deep inside, I want him.

Love Talk, anong dapat kong gawin? Mahal at minahal ko din si Lester, at hanggang ngayon ay gano’n pa rin ang nararamdaman ko sa kanya. Ramdam kong gano’n din siya sa akin. Pero paano na lang si Joy? Naguguluhan na talaga ako. Dapat ko pa rin bang sundin ang sinasabi ng puso ko, o dapat ko bang kalimutan ito? Ano nga ba ang dapat at tama kong gawin? Sana naman ay mapayuhan ninyo ako.

Maraming salamat sa inyo na nakinig at sa pagbibigay ng oras sa sulat ko. Umaasa ako sa payo ninyo.

Gumagalang,

“AMY”

Pinag-taksilan ng kaibigan

Dear YES Love Talk,

Mainit na pag-bati po sa mga taga-subaybay ng programang ito.

Itago n’yo na lang ako sa pangalang “PINKY”. Sumulat po ako para may mapag-sabihan ng problema ko at para mang-hingi na din sa inyo ng payo.

Isang taon na kaming hiwalay ng ex boyfriend ko na tawagin na lang nating si “JOEMAR”. Ako ang nakipag-kalas sa kanya. Noong mga panahong iyon kasi, paalis ako papunta ng ibang bansa para magtrabaho. Hindi naman para lang sa akin ito kundi para na din sa amin. Ayoko din naman kasing nasa long distance relationship kami.

Naging maayos ang aming pag-hihiwalay. Ipinangako ko sa kanya na babalik ako sa kanya sa pag-uwi ko galing sa ibang bansa. Umasa talaga akong pag-balik ko dito sa Pilipinas ay magkakabalikan kami at magiging maayos na ang lahat. Pero doon pa yata lalong naging malabo ang lahat.

Hindi ako nag-tagal sa trabaho. Naging maaga ang pag-balik ko dito sa bansa dahil hindi ko kinaya ang trabaho sa labas, at ang mapalayo sa pamilya ko.

Pag-dating ko dito, nabalitaan ko na lang na si Joemar ay mayroon nang ibang nobya. At ang masakit pa, best friend ko pa ang napili niyang gawing girlfriend.

Alam ng best friend ko na mahal ko pa si Joemar at ginawa ko lang ang pakikipag-break sa kanya dahil ayokong mag-alala siya sa akin at ayokong ‘yon pa ang pag-awayan namin. Tapos parang tinake niya ang opportunity na ‘yon para sa sarili niya. Pakiramdam ko tinraydor ako ng isa sa mga taong pinagkatiwalaan ko ng lubos. Kaya pala siguro hindi nagkukuwento sa akin ang best friend ko tungkol sa love life niya, dahil ako pala ang nawalan.

Love Talk, pakiramdam ko niloko ako at umasa ako sa wala. Hindi ko pa rin matanggap ang mga nangyaring ito sa akin. Nawala nang tuluyan ang taong minamahal ko, at tinraydor at inagawan ako ng taong labis na pinagkatiwalaan ko. Ito na siguro ‘yung tinatawag nilang “namumuhi”, ‘yon na siguro ang nararamdaman ko sa best friend ko.

Alam kong hindi maganda ito. Hindi ako natatahimik dahil palagi ko silang naiisip, lalo na ang pang-aagaw at panlolokong ginawa ng best friend ko. Parang hindi ko siya mapatawad at parang hindi ko siya kayang patawarin. Love Talk, anong dapat kong gawin? Sana ay mapayuhan n’yo ako.

Maraming salamat sa pag-basa ng sulat ko at sana ay matulungan n’yo ako.

Umaasa,

“PINKY”